لال چوک پر پی ڈی پی رہنما نے جموں و کشمیر کا پرچم لہرانے کی کوشش کی

نذیر احمد یتو سرینگر کے لال چوک پر اچانک پہنچ گئے ان کے ہاتھ میں جموں و کشمیر کا سابق پرچم تھا جسے لے کر وہ نعرہ بازی کرنے لگے۔ لیکن موقع پر موجود پولیس کی نفری نے انہیں دبوچ لیا اور ان کے ہاتھ سے جھنڈا چھین کر انہیں حراست میں لیا۔

مرکز کے زیرانتظام جموں و کشمیر کے گرمائی دارالحکومت سرینگر میں آج پیپلز ڈیموکریٹک پارٹی کے سینئر رہنما نذیر احمد یتو کو پولیس نے اس وقت گرفتار کیا جب انہوں نے جموں وکشمیر کا پرچم تاریخی گھنٹہ گھر پر لہرانے کی کوشش کی۔

اطلاعات کے مطابق نذیر احمد سرینگر کے لال چوک پر اچانک آ پہنچے۔ ان کے ہاتھ میں جموں و کشمیر کا سابق پرچم تھا جسے لے کر وہ نعرہ بازی کرنے لگے۔ لیکن موقع پر موجود پولیس کی نفری نے انہیں دبوچ لیا اور ان کے ہاتھ سے جھنڈا چھین کر انہیں پولیس کی گاڑی میں بٹھا کر اپنے ساتھ لے گئے۔

واضح رہے گزشتہ برس پانچ اگست 2019 سے قبل جموں و کشمیر کا اپنا ائین اور جھنڈا تھا لیکن مرکزی حکومت کی جانب سے جموں و کشمیر کی خصوصی پوزیشن منسوخ کرنے کے بعد خطہ کو دو مرکز کے زیرانتظام علاقوں میں تقسیم کر دیا گیا۔ اور اب یہاں سرکاری سطح پر صرف بھارت کا پرچم ہی لہرایا جاتا ہے۔ اس سے قبل یہاں حکومتی سطح پر دو پرچم (بھارت کا اور ریاست کا) لہرائے جاتے تھے۔