Rehabilitation Policy for House Boat Owners ہاؤس بوٹ مالکان کے لئے بازآبادکاری پالیسی کی تجویز

پارلیمانی سیشن میں ہاؤس بوٹ مالکان اور شکارا والاز کے لیے بازآبادکاری کے لیے ایک پالیسی مرتب کرنے کی سفارش کی گئ ہے۔ تاہم ہاؤس بوٹ مالکان کا کہنا ہے کہ وہ اپنے روایتی کام کو ہرگز ترک کرنا پسند نہیں کریں گے۔ House Boat Owners Rehabilitation Policy

سرینگر: وادی کشمیر کے جھیل ڈل اور نگین میں ہاؤس بوٹ اور شکارا مالکان کی باز آبادکاری کی سفارش پارلیمانی سٹینڈنگ کمیٹی نے کی ہے۔ پارلیمان اسٹینڈنگ کمیٹی برائے داخلہ امور نے پارلیمنٹ میں رپورٹ پیش کی ہے جس میں کمیٹی نے ان ہاؤس بوٹ اور شکارا مالکان کی بازآبادکاری کی پالیسی تجویز کی ہے جو اپنا روایتی کاروبار چھوڑ کر متبادل روزگار کے مواقع تلاش کرنا چاہتے ہیں۔

کمیٹی نے یہ رپورٹ حالیہ پارلیمانی سیشن میں پیش کی ہے اور حکومت سے اس ضمن میں پالیسی مرتب کرنے کی تجویز کی۔ تاہم ہاؤس بوٹ مالکان اس تجویز سے متفق نہیں ہے کیونکہ انکے مطابق وہ اپنی روایت اور پہچان کو ختم نہیں کرنا چاہیں گے۔ ہاؤس بوٹ کشمیر کی مشہور - ڈل اور نگین - جھیلوں میں واقع ہے جو سیاحوں کے لئے ہمیشہ سے کشش کا باعث بنتے ہیں۔ نوے کی دہائی سے قبل، جب کشمیر میں عسکریت پسندی شروع ہوئی، یہ ہاؤس بوٹ بیرون ممالک سے آئے سیاحوں کا مسکن ہوتے تھے تاہم نوے کے بعد بیرونی سیاحوں کی آمد میں کمی واقع ہونے کے بعد سے ان میں دیگر ریاستوں کے سیاح بھی رہنے لگے۔

قابل ذکر ہے کہ کہ ہاؤس بوٹ دیودار کی لکڑی سے تعمیر ہوتے ہیں جس پر کروڑوں روپے کا خرچہ آتا ہے اور ہاؤس بوٹس کی تعمیر کرنے والے مخصوص دستکار ہی ہاؤس بوٹ کی تعمیر اور اس کی نقشہ نگاری انجام دے سکتے ہیں۔ ڈل جھیل اور نگین میں 1200 سے زائد ہاؤس بوٹ تھے تاہم آتشزدگی اور خرابی کی وجہ سے آج محض 900 ہاؤس بوٹ باقی رہے گئے ہیں۔

انتظامیہ نے سنہ 1996 میں ڈل یا نگین جھیلوں میں نئے ہاؤس بوٹ تعمیر کرنے پر پابندی عائد کر دی تھی تاکہ ڈل کے پانی اور ماحول کو مزید آلودگی سے بچایا جا سکے۔ رواں برس جون میں انتظامیہ نے ہاؤس بوٹس کی مرمت کے لئے ہاؤو بوٹ مالکان کے لئے رعایت پر لکڑی فراہم کرنے کا اعلان کیا تھا تاہم ابھی تک انہیں یہ لکڑی دستیاب نہیں کی گئی ہے۔ پارلیمانی کمیٹی نے اس بات کو سراہا ہے کہ حکومت نے ہاؤس بوٹ مالکان کے مطالبے پر احسن طریقے سے توجہ دے کر انکو رعایت پر لکڑی فراہم کی ہے۔