Organ Transplant Awareness: سرینگر میں اعضاء کی پیوندکاری سے متعلق بیداری پروگرام کا انعقاد

کشمیر یونیورسٹی، اسٹیٹ آرگن اینڈ ٹشو ٹرانسپلانٹ آرگنائزیشن اور جے کے سائنس اینڈ انوویشن کونسل کے اشتراک سے منعقدہ بیداری پروگرام میں ماہرین نے اعضاء کی پیوندکاری کی اہمیت اور در پیش مسائل پر گفتگو کی۔ Organ Transplant Awareness Programme in Kashmir

سرینگر (جموں و کشمیر):کشمیر یونیورسٹی میں اعضاء کے عطیہ اور ٹِشو ٹرانسپلانٹ کے بارے میں ایک بیداری پروگرام کا اہتمام کیا گیا، جس میں ماہر ڈاکٹروں اور ماہرین تعلیم نے اعضاء عطیہ کرنے سے متعلق آگاہی فراہم کی۔ بیداری پروگرام کشمیر یونیورسٹی کے شعبہ بائیو ریسورسز اور انسٹی ٹیوٹ آف ہوم سائنس نے جموں وکشمیر اسٹیٹ آرگن اینڈ ٹشو ٹرانسپلانٹ آرگنائزیشن اور جے کے سائنس اینڈ انوویشن کونسل کے اشتراک سے کیا۔

کشمیر یونیورسٹی کی وائس چانسلر پروفیسر نیلوفر خان نے مہمان خصوصی کے طور پر شرکت کی۔ جبکہ تقریب میں کمشنر سیکریٹری سائنس اینڈ ٹیکنولوجی سوربھ بھگت، ڈائریکٹر سکمز صورہ پروفیسر پرویز اے کول، ایچ او ڈی یورولوجی سکمز صورہ، پروفیسر سلیم وانی اور رجسٹرار ڈاکٹر نثار اے میر نے شرکت کی۔ اس موقع پر وائس چانسلر پروفیسر نیلوفر خان نے کہا کہ اس طرح کے بیداری پروگرام وقت کی اہم ضرورت ہے تاکہ ابھرتے ہوئے صحت کے مسائل کو باہمی تعاون کے ساتھ حل کیا جاسکے۔

اپنے خصوصی خطاب میں سوربھ بھگت نے کہا کہ اس طرح کے آگاہی پروگرامز کی کافی اہمیت ہے کیونکہ ملک میں 6 سے 7 لاکھ لوگ گردے کی پیوندکاری کے منتظر ہیں جبکہ اتنی ہی تعداد میں لیور ٹرانسپلانٹ یا آنکھوں کی پیوندکاری کی تلاش میں ہیں۔ سکمز صورہ کے ڈائریکٹر پروفیسر پرویز اے کول نے کہا کہ ’’آپ خود زندہ رہتے ہوئے ایک زندگی بچا سکتے ہیں اور ملک اور دنیا کے بیشتر ممالک میں ٹرانسپلانٹیشن کا عمومی رجحان ہے۔‘‘ چند برس قبل اعضاء کی پیوندکاری کے سکمز صورہ کے آغاز اور اس عمل میں اس کی نئی پیش رفت پر روشنی ڈالتے ہوئے انہوں نے کہا کہ پیوندکاری کو جدید سائنس کے عجائبات میں سے ایک سمجھا جاتا ہے۔ اس موقع پر پروفیسر سلیم وانی نے ٹرانسپلانٹیشن کی راہ میں درپیش چیلنجز اور آگے بڑھنے کے راستے پر بات کی۔