Non Local Died in Kashmir کشمیر میں دو غیرمقامی مزدوروں کی لاشیں پراسرار حالت میں برآمد

سرینگر اور گاندربل میں ہفتہ کے روز دو غیرمقامی مزدوروں کی لاشیں پراسرار حالت میں برآمد ہوئی ہے۔ پولیس نے اس سلسلے میں کیس درج کرکے تحقیقات شروع کی ہے۔

سرینگر: وسطی ضلع گاندربل کے گگن گیر علاقے میں ہفتے کی صبح ایک غیرمقامی مزدور کی لاش پرا سرار حالت میں برآمد ہوئی۔ اطلاعات کے مطابق گاندربل کے گگن گیر علاقے میں ہفتے کی صبح غیرمقامی مزدور کی لاش ملی۔ معلوم ہوا ہے کہ پولیس نے لاش کو تحویل میں لے کر اس کی شناخت سدھاکر پرساد ولد بیجنا تھ رام ساکن اترپردیش کے بطور کی۔ پولیس نے لاش کو طبی اور قانونی لوازمات کی خاطر سب ضلع ہسپتال کنگن منتقل کیا۔

ادھر سرینگر کے بسنت باغ علاقے میں ہفتے کے روز ایک غیرمقامی باشندے کو کرائے کے کمرہ میں لٹکا ہوا پایا گیا۔ اس حوالے سے ایک اہلکار نے بتایا کہ بہار کا ایک 18 سالہ نوجوان بسنت باغ سرینگر میں لٹکا ہوا پایا گیا جہاں وہ کرایہ دار کے طور پر رہ رہا تھا۔ بیہوشی کی حالت میں نوجوان کو ایس ایم ایچ ایس سرینگر لایا گیا جہاں ڈاکٹروں نے اسے مردہ قرار دے دیا۔ اس سلسلے میں پولیس نے کیس درج کرکے تفتیش شروع کر دی گئی ہے۔

واضح رہے کہ کچھ روز قبلشوپیاں کے بابا محلہ علاقے میں ایک غیر مقامی مزدور کی لاش کرائے کے کمرے میں پائی گئی۔ اگرچہ مزدور کو بیہوشی کی حالت میں ہسپتال منتقل کیا گیا تاہم وہاں پر تعینات ڈاکٹروں نے اسے مردہ قرار دیا۔متوفی کی شناخت تجمل شیخ ولد افسر شیخ ساکن مغربی بنگال کے بطور ہوئی ہے۔