کشمیر میں سیلابی صورتحال کا کوئی امکان نہیں: محکمۂ موسمیات

وادیٔ کشمیر میں موسلا دھار بارشوں کی پیشگوئی کے بیچ سماجی رابطہ گاہوں پر ممکنہ سیلابی صورتحال سے متعلق گشت کررہی خبروں کی تردید کرتے ہوئے محکمۂ موسمیات نے عوام سے افواہوں پر کان نہ دھرنے کی اپیل کی ہے۔

موسم میں تبدیلی اور بارشوں کے حوالے سے ممکنہ سیلابی صورتحال سے متعلق سوشل میڈیا اور اخبارات میں خبریں شائع ہونے کے بیچ محکمۂ موسمیات کے ڈائریکٹر سونم لوٹس نے کہا ہے کہ ’’وادیٔ کشمیر میں سیلابی صورتحال پیدا ہونے کا کوئی امکان ہی نہیں ہے اور لوگوں کو گھبرانے کی ضرورت نہیں۔‘‘

محکمۂ موسمیات نے پیشگوئی کی تھی کہ 19 سے 21 جولائی تک وادیٔ کشمیر کے بالائی اور میدانی علاقوں میں بارشیں ہوسکتی ہیں، جب کہ بالائی علاقوں میں گرج چمک کے ساتھ بادل پھٹنے کے واقعات رونما ہونے کے باعث ندی نالوں میں پانی کی سطح بڑھ جائے گی۔

محکمہ کی اس پیشگوئی کے ساتھ ہی سوشل میڈیا پر کئی افراد نے افوائیں پھیلائی کہ محکمہ نے سیلاب آنے کا امکان ظاہر کیا ہے جس کی موسمیات محکمہ نے تردید کرتے ہوئے کہا کہ بالائی علاقوں کے ندی نالوں میں پانی کی سطح بڑھنے کا امکان ہے جب کہ میدانی علاقوں میں سیلابی صورتحال پیدا ہونے کا کوئی امکان نہیں ہے۔

محکمہ موسمیات کے ڈائریکٹر سونم لوٹس نے کہا کہ 19 سے جولائی سے موسم میں تبدیلی آنے کے امکانات ہیں۔ رواں ماہ کی 21جولائی تک وادی کشمیر کے بالائی اور میدانی علاقوں میں موسلا دھار بارشیں ہوسکتی ہیں۔ انہوں نے جنوبی کشمیر میں زیادہ بارشیں ہونے جبکہ وسطی کشمیر میں ہلکی سے درمیانہ درجے کی بارشیں ہونے کی پیشگوئی کی ہے۔

واضح رہے محکمہ موسمیات کی پیشگوئی کے عین مطابق 18اور 19 کی درمیانی شب سے سرینگر سمیت وادی کے دیگر اضلاع میں بھی گرج چمک کے ساتھ ہلکی بارشیں ہوئیں، جس سے گزشتہ دنوں شدت کی گرمی سے لوگوں کو کسی حد تک راحت محسوس ہوئی۔