'بغیر ماسک کے مسافر ایئرپورٹ میں داخل نہ ہوں'

ایک سرکیولر میں بتایا گیا ہے کہ سرینگر کے بین الاقوامی ہوائی اڈے پر آنے والے مسافر نہ ہی ماسک کا استعمال کرتے ہیں اور نہ ہی سماجی دوری کا خیال رکھا جاتا ہے جس کے نتیجے میں ایئرپورٹ پر کورونا وائرس کے پھیلاؤ کے خدشات اور خطرات بڑھ گئے ہیں۔

سرینگر کے بین الاقوامی ہوائی اڈے میں مسافروں کی جانب سے کووڈ 19 سے بچاؤ کی خاطر ضروری اقدامات اور پروٹوکال کا خیال نہ رکھنے کا سنجیدہ نوٹس لیتے ہوئے ایئرپوٹ اتھارٹی کے جوائنٹ ڈائریکٹر جنرل سنیل کمار نے ایک سرکیولر جاری کیا ہے جس میں انہوں نے مسافروں کو ضوابط پر من و عن عمل کرنے پر زوردیا ہے۔ وہیں انہوں نے ایئرپورٹ میں تعینات سیکورٹی اور دیگر حکام کو ہدایت دی ہے کہ وہ کسی بھی مسافر کو کووڈ ضوابط کی خلاف ورزی کرنے کی اجازت نہ دے۔

جاری کردہ سرکیولر میں کہا گیا ہے کہ سرینگر کے بین الاقوامی ہوائی اڈے پر آنے والے مسافر نہ ہی ماسک کا استعمال کرتے ہیں اور نہ ہی سماجی دوری کا خیال رکھا جاتا ہے جس کے نتیجے میں ایئرپورٹ پر کورونا وائرس کے پھیلاؤ کے خدشات اور خطرات بڑھ گئے ہیں۔

ایئرپورٹ اتھارٹی نے اپنے سرکیولر میں آئی ایس ایف اور پولیس اہلکاروں کو بھی ہدایت جاری کی ہے کہ وہ کسی بھی ایسے مسافر کو ایئرپورٹ کے اندر داخل ہونے کی اجازت نہ دیں جس نے فیس ماسک نہ پہنی ہو۔ جبکہ ایئرپورٹ ٹرمنل منیجر سے بھی کہا گیا ہے کہ وہ اس بات کو یقینی بنائیں کہ مختلف فضائی کمپنیوں کے عملے کے ساتھ ساتھ مسافر بھی ایئرپورٹ پر ماسک پہنے، سماجی دوری اور دیگر کووڈ 19 رہنما خطوط کا خاص دھیان رکھیں۔