آئی ایس ایل 2020-21: کشمیر میں فٹ بال کا نیا چہرہ، محیط شبیر خان

فٹبال کے میدان میں زبردست کامیابی حاصل کرنے والے سری نگر کے علاقے بٹہ مالو سے تعلق رکھنے والے 19 سالہ فٹ بالر محیط شبیر خان اس سیزن کی انڈین سپر لیگ 2020-21 میں شامل ہونے کے لیے تیار ہیں۔

محیط ایک سال قبل انڈر 18 میں گول کیپر کی حیثیت سے کیرالہ بلاسٹرز میں شامل ہوئے، محیط سری نگر کے علاقے بٹہ مالو سے تعلق رکھتے ہیں، محیط کو پہلے ریزرو کھلاڑیوں کی فہرست میں رکھا گیا تھا اور اب اس سیزن کے آئی ایس ایل کے لیے کیرالہ بلاسٹرز کی پہلی ٹیم میں شامل کیا گیا ہے۔ محیط فی الحال ٹیم کے باقی ممبروں کے ساتھ کیرالہ بلاسٹرز کے بائیو سکیور میں ہیں۔

ای ٹی وی بھارت کے ساتھ گفتگو کے دوران محیط نے کہا کہ "میں نے 6سال کی عمر سے ہی فٹ بال کھیلنا شروع کیا اور میرے والد شبیر احمد خان گول کیپر تھے اس لیے میں بھی انہیں دیکھ کر گول کیپر ہی بنا، 15 سال کی عمر تک میری تربیت میرے والد نے ہی کی، اس کے بعد میں نے مقامی مقابلوں میں بطور گول کیپر حصہ لیا۔"

محیط نے کہا کہ کیرالہ بلاسٹرز کی مرکزی ٹیم کے ساتھ رہنا بہت اچھا ہے، یہاں تک پہنچنے اور اس سیزن آئی ایس ایل کے لیے پہلی ٹیم میں اپنی جگہ محفوظ بنانے کے لیے سخت محنت کی ہے، جس کے نتیجے میں اب مجھے کیرلا کے ٹیم کے ساتھ پانچ سال کا کانٹریکٹ بھی مل چکا ہے۔

سرینگر سے کیرالا بلاسٹرز تک کے سفر کے بارے میں بات کرتے ہوئے محیط نے کہا کہ "جب اشفاق بھائی نے میرے والد کو یہ کہا کی میں آپ کے فرزند کے کھیل سے متاثر ہوا ہوں اور انہیں کیرالا بلاسٹرز کے ساتھ مزید تربیت اور ٹیم کی طرف سے کھیلنے کے لیے لے جانا چاہتا ہوں تو میرے والد نے حامی بھر دی اور آج میں انڈین سپر لیگ میں کیرلا کی طرف سے کھیلوں گا، اسحاق بھائی ہمارے اسسٹنٹ کوچ ہیں۔"

محیط نے کہا کہ میرے والد نے مجھ پر ہمیشہ بھروسہ کیا اور جس کا نتیجہ آپ کے سامنے ہے اور میں انہیں کبھی مایوس نہیں کروں گا، وادی کے کھلاڑی معرج الدیں، اشفاق احمد، ساجد یوسف اور دیگر سینیئر کھلاڑی ہمیشہ میری حوصلہ افزائی کرتے ہیں۔"

کیرلا بلاسٹرز میں جگہ حاصل کرنے کے لیے انہیں کیا کرنا پڑا؟ اس سوال کے جواب میں محیط کا کہنا ہے کہ "مجھے جگہ ملنے کی وجہ میری لمبائی کے ساتھ ساتھ میرے ٹرائل کے دوران میری بہترین کارکردگی رہی ہے اور اب مجھے کیرلا کے ٹیم کے ساتھ پانچ سال کا کانٹریکٹ بھی مل چکا ہے۔ "

وادی کشمیر سے معراج الدین وڈیو اور اسحاق احمد کے بعد محیط شبیر خان انڈین سپر لیگ میں کھیلنے والے تیسرے کشمیری کھلاڑی ہونگے۔

واضح رہے اس سیزن لیگ کی تیاریاں کووڈ 19 وبائی بیماری کی وجہ سے بائیو سیکیور میں موجود ٹیموں کے ساتھ پہلے ہی شروع ہوچکی ہیں، اس سیزن میں آئی ایس ایل کا انعقاد نومبر 2020 سے مارچ 2021 تک ہونا ہے لیکن وبائی امراض کی وجہ سے گوا کے تین مقامات پر ہونے کا امکان ہے۔