'ہلاک شدہ عسکریت پسند پنچ کے اغوا اور قتل میں ملوث تھے'

کشمیر پولیس زون کے انسپکٹر جنرل وجے کمار نے کہا کہ ہلاک شدہ عسکریت پسند سرینگر کے مضافاتی علاقے کھنموہ سے تعلق رکھنے والے پنچ کے اغوا اور قتل میں براہ راست ملوث تھے۔

بتا دیں کہ آج شوپیاں کے کلورہ علاقے میں جمعے کو عسکریت پسندوں اور سیکیورٹی فورسز کے درمیان ہونے والے ایک مسلح تصادم میں چار عسکریت پسند مارے گئے جبکہ ایک عسکریت پسند نے خودسپردگی کی ہے۔

سرینگر میں پریس کانفرنس کے دوران وجے کمار نے کہا کہ کھنمو کے پنچ نثار احمد کی ہلاکت میں البدر کے پانچ عسکریت پسند شامل تھے جن میں سے چار کو شوپیان کے کلورہ علاقے میں ہلاک کیا گیا جبکہ ایک عسکرہت پسند کو زندہ گرفتار کیا گیا۔

وجے کمار کا کہنا تھا کہ ہلاک شدہ عسکریت پسندوں میں شوپیان ضلع کے البدر تنظیم کے کمانڈر شکور پرے اور انکے ساتھی سہیل بھٹ کی شناخت ہوچکی ہے، جو پنچ کی ہلاکت میں ملوث تھے۔

انکا کہنا تھا کہ دیگر ہلاک شدہ عسکریت پسندوں کی شناخت کی جا رہی ہے جبکہ گرفتار کیے گیے عسکریت پسند کو پولیس کی تحویل میں لیا گیا ہے۔

انکا مزید کہنا تھا ہلاک شدہ عسکریت پسندوں سے دو اے کے 47 رائفلز اور تین پستول برآمد کئے گئے ہیں۔

قابل ذکر ہے کہ ہلاک شدہ پنچ گزشتہ دنوں شوپیان ضلع میں گمشدہ ہوئے تھے تاہم ایک نامعلوم آڈیو سوشل میڈیا پر گشت کر رہا تھا جس میں ایک نامعلوم شخص نے اس کو ہلاک کرنے کا دعویٰ کیا تھا اور کہا تھا کہ کووڈ 19 کی وجہ سے اس کی لاش کی تدفین بھی کی گئی تھی۔ تاہم پولیس نے آج اسکی لاش دانگام علاقے کے ایک باغ سے برآمد کی۔