Talk With Sadiya Wani جموں و کشمیر کی اٹھارہ سالہ کرکٹر، سعدیہ وانی

جموں و کشمیر کے کھلاڑیوں نے بھارتی کرکٹ ٹیم میں اپنے شاندار کھیل کا مظاہرہ کرکے شائقین کی توجہ اپنی جانب مرکوز کرنے میں کامیاب رہے ہیں وہیں اب وادی کی خواتین بھی کرکٹ میں اپنے بلے بازی اور گیند بازی سے قومی ٹیم میں جگہ بنانے کے لیے پرجوش ہیں۔ Meet Sadiya Wani an Impressive Cricketer From Kashmir

سرینگر: جموں و کشمیر کے عابد نبی، پرویز رسول، عبدالصمد اور اب عُمران ملک جیسے کرکٹ کھلاڑی جہاں بھارتی کرکٹ کے گلیاروں میں اپنے کھیل سے شائقین کو متاثر کیا ہے وہیں اب خطے کی خواتین بھی کرکٹ میں اپنے جوہر دکھا رہی ہیں۔ ایسی ہی ایک کھلاڑی سرینگر کی رہنے والی سعدیہ وانی ہیں۔ حالانکہ سعدیہ وانی کی عمر اٹھارہ برس ہے۔ تاہم تیرہ سال کی عمر میں ہی انڈر 19 اور انڈر 23 میں شاندار کھیل کا مظاہرہ کرکے خواتین کی سینئر ٹیم میں جگہ بنانے میں کامیاب رہی۔ اور حال ہی میں نیشنل کرکٹ اکیڈمی میں ٹریننگ کے دوران انہوں نے اپنے کھیل سے سب کو متاثر کیا ہے۔ای ٹی وی بھارت سے خصوصی بات چیت کے دوران سعدیہ نے کہا کہ وہ آل راؤنڈر ہیں اور انہیں بڑے شارٹ کھیلنا بہت پسند ہے۔

سعدیہ نے کہا کہ میں بھارتی کھلاڑی رینوکا سنگھ سے کافی متاثر ہو اور انہی کی طرح بھارتی کرکٹ ٹیم میں بطور گیند باز کھیلنا چاہتی ہوں۔ انہوں نے بتایا کہ مجھے آسٹریلیا کے آل راؤنڈر ایلیس پیری بھی کافی پسند ہے، ان کا کھیل لاجواب ہے۔ وہیں بھارتی ٹیم کے کھلاڑی ہاردک پانڈیا میرے پسندیدہ کھلاڑی ہیں۔ انہوں نے کہا کہ میں باؤلر ہوں اسی لیے مجھے عمران ملک سے انسپریشن ملتا ہے۔ انڈر 19 میں نے بھارتی قومی کھلاڑی اروندتی ریڈی اور نزہت پروین کے وکٹ لیے تھے، یہ میرے کیریئر کا بہترین پل تھا کیونکہ ٹیم میں میں سب سے چھوٹی تھی ۔ اپنے کرکٹ سفر کی شروعات کے بارے میں بات کرتے ہوئے کہا کہ میں بچپن سے ہی اپنے بھائی اور محلہ کے دوستوں کے ساتھ کرکٹ کھیلا کرتی تھی۔ سب کو پتہ تھا میں کھیلتی ہوں اس لیے مجھے تنقید کا سامنا نہیں کرنا پڑا۔ ایک دن جب اسکول سے واپس آتے ہوئے میں نے ٹی آر سی گراؤنڈ میں لڑکیوں کو کرکٹ کھیلتا دیکھا تو میں نے اپنے بڑے بھائی سے بات کی۔ جس کے بعد انہوں نے میرا رجسٹریشن کرایا اور میرا سفر وہیں سے شروع ہوا۔ تب سے آج تک مجھے میرے والدین، رشتہ دار اور پڑوسیوں کا ہمیشہ ساتھ ملا ہے۔

انہوں نے کہا کہ اکثر لڑکیاں سماجی دباؤ، مالی حالت اور دیگر مسائل کی وجہ سے کھیل کو بیچ میں ہی چھوڑ دیتی ہیں۔ پر میرے ساتھ ایسا کچھ نہیں ہوا ہر کسی نے میری بھرپور مدد کی۔ فلم چک دے انڈیا اور بھارتیہ کرکٹ ٹیم کی سابق کپتان متالی راج کی زندگی پر بنائی گئی فلم پر بات کرتے ہوئے انہوں کہا کہ دونوں فلموں میں کئی خواتین کے ساتھ بھید بھاؤ ہوا ہے۔ لیکن جموں و کشمیر کرکٹ ایسوسی ایشن کسی کھلاڑی کے ساتھ کوئی نا انصافی نہیں کرتا۔ کھلاڑی چاہے مرد ہو یا خواتین ہر کسی کو برابر مواقع فراہم کیے جاتے ہیں اور کیمپ کے دوران بہترین کوچ بھی فراہم کیے جاتے ہیں۔ سعدیہ نے کہا کہ وہ اپنی گیندبازی میں بہتری لانے کے لیے ایم آر ایف پیس اکیڈمی میں بھی داخلہ لینے کا سوچ رہی ہے لیکن اس کے لیے اسے کشمیر سے باہر جانا ہوگا۔ حالانکہ اٹھارہ برس کی یہ کھلاڑی اپنا زیادہ تر وقت پڑھائی اور کرکٹ میں صرف کرتی ہیں لیکن سعدیہ کا ماننا ہے کہ ایک پروفیشنل کالج میں داخلہ حاصل کرنے بعد بھی ایک کھلاڑی کو کھیل سے دور نہیں ہونا چاہیے۔ کیونکہ کھیل سے صحت بھی اچھی رہتی ہے۔

سعدیہ کو بائیک رائیڈنگ کا بھی کافی شوق ہے اور حال ہی میں وہ اپنا ڈرائیونگ لائسنس بھی حاصل کر چکی ہیں۔ان کا کہنا ہے کہ مجھے بائیک چلانا بہت پسند ہے۔ بھائی نے سکھایا ہے اور اب اسٹنٹ کرنا سیکھ رہی ہوں۔ میں رائڈر کرکٹر بننا چاہتی ہوں۔دلچسپ بات یہ ہے کہ کشمیر میں خواتین کو اسکوٹی اور گاڑی چلاتے ہوئے تو دیکھا گیا ہے تاہم سعدیہ واحد ایسی لڑکی ہیں جو انسٹا گرام پر اپنی بائیک رائیڈنگ کی ویڈیوز بھی پوسٹ کرتی رہتی ہیں۔