لاک ڈاون: سرینگر میں سنیچر سے دکانیں کھلیں گی

کورونا وائرس کے پھیلاو کو روکنے کے لیے عائد لاک ڈاؤن میں تقریباً تین ماہ بعد شہر سرینگر میں سنیچر سے دکانین اور دیگر تجارتی مراکز رہنمایانہ خطوط کے تحت کھولنے کی اجازت دی گئی ہے۔

سرینگر کے ضلع مجسٹریٹ شاہد اقبال چودھری نے جمعہ کو ہدایت جاری کرتے ہوئے کہا کہ ایک شیڈول کے تحت شہر میں لاک ڈاؤن میں نرمی دی جائے گی جس کے تحت مجسٹریٹ نے دکانوں کو تین زمروں میں تقسیم کیا ہے اور اسی شیڈول کے تحت دکانیں کھولی جائیں گی۔

جن دکانوں کو پیر سے سنیچر صبح 11 بجے سے شام 5:30 تک کھولنے کی اجازت دی گئی ہے ان میں کتابیں، اسٹیشنری، دواساز، گراسریز، سبزی و میوہ فروش، دودھ فروخت کرنے والے، فارمنگ سامان اور دیگر اہم اشیاء بیچنے والے دکاندار شامل ہیں۔

کپڑے، ریڈی میڈ گارمنٹس، کاسمیٹکس، فوٹ ویئر، الیکٹرانکس، جویلری، بوٹیکس اور درزی کی دکانیں صرف سوموار، بدھوار اور جمعہ کے روز صبح 11 بجے سے شام 5:30 تک کھلیں گی۔

جبکہ تیسرے زمرے میں ہینڈی کرافٹس، ہینڈلوم، تعمیراتی سامان، فرنیچر، آٹو موبائلز، سروس سٹیشن اور دیگر شعبے منگل، جمعرات اور سنیچر کو صبح 11 سے شام ساڑھے پانچ بجے تک کھلے رہیں گے۔

واضح رہے کہ لاک ڈاؤن کی وجہ سے تاجرین سمیت دیگر شعبہ ہائے زندگی بری طرح متاثر ہو رہے تھے، تاہم وادی کے دیگر اضلاع میں لاک ڈاؤن میں کوئی بڑی نرمی نہیں دی گئی ہے۔

قابل ذکر ہے کہ جموں و کشمیر میں کووڈ19 کے مثبت کیسز کی تعداد میں اضافہ ہوتا جا رہا ہے اور مصدقہ کسیز کی تعداد قریباً پانچ ہزار تک پہنچ چکی ہے جبکہ 51 افراد اس مہلک وائرس کی وجہ سے انتقال کر چکے ہیں۔