ضلع مجسٹریٹ سری نگر اعجاز اسد نے لوگوں سے کورونا گائیڈ لائنز پر سختی سے عمل کرنے کی تاکید کرتے ہوئے کہا ہے کہ کورونا لاک ڈاؤن میں نرمی کا مطلب کھلی چھوٹ نہیں ہے۔
انہوں نے کہا کہ ضلع سری نگر میں 96 علاقوں کو کنٹینمنٹ زون قرار دیا گیا جہاں مکمل لاک ڈاؤن ہی نافذ رہے گا۔
موصوف ضلع مجسٹریٹ نے ان باتوں کا اظہار اپنے ایک ویڈیو بیان میں کیا۔
انہوں نے کہا: 'سری نگر میں 96 کنٹینمنٹ زون ہیں جن میں ایک طرح کا لاک ڈاؤن ہی نافذ رہے گا۔'
ان کا کہنا تھا کہ لاک ڈاؤن میں نرمی کا مطلب کھلی چھوٹ نہیں ہے بلکہ لوگوں کو کورونا پروٹوکال پر سختی سے عمل کرنا چاہئے۔
اعجاز اسد نے کہا کہ لاک ڈاؤن میں نرمی کے دوران اگر ذرا سی بھی غلطی کی گئی تو اس کا خمیازہ پورے معاشرے کو بھگتنا پڑے گا۔
انہوں نے کہا کہ سری نگر آرینج زون ہے اگر پروٹوکال کی خلاف ورزی کی گئی تو ریڈ زون میں جا سکتا ہے۔
قابل ذکر ہے کہ جموں وکشمیر انتظامیہ نے کورونا کی دوسری لہر میں کمی واقع ہونے کے ساتھ ہی یونین ٹریٹری میں ایک ماہ کے بعد پیر کے روز کورونا کرفیو میں نرمی کی۔
یو این آئی
