سرینگر: جموں وکشمیر کے لیفٹیننٹ گونر منوج سنہا نے کہا ہے کہ کھیلو انڈیا سرمائی کھیلوں کے گذشتہ ایڈیشنوں کی کامیابی نے جموں و کشمیر کو سرمائی کھیلوں کے مرکز میں تبدیل کر دیا ہے۔ انہوں نے شراکت داروں سے سیاحتی مقام گلمرگ میں منعقد ہونے والی کھیلو انڈیا سرمائی کھیلوں کے لئے بین الاقوامی معیار کی سہولیات دستیاب رکھنے کی تاکید کی۔
موصوف لیفٹیننٹ گورنر نے منگل کے روز گلمرگ میں 2 فروری سے شروع ہونے والی کھیلو انڈیا سرمائی کھیلوں کے لئے کی جا رہی تیاریوں کا جائزہ لینے کے لئے ایک میٹنگ کی صدارت کی۔
انہوں نے سماجی رابطہ گاہ 'ایکس' پر ایک پوسٹ میں کہا: 'میٹنگ کے دوران میں نے تمام متعلقہ محکموں کو مل کر کام کرنے کی ہدایت دی تاکہ کھلاڑیوں اور سرمائی کھیلوں کے شائقین کے لئے یہ ایک یاد گار تجربہ رہے'۔
منوج سنہا کا کہنا تھا کہ کھیلو انڈیا سرمائی کھیلوں کے گذشتہ ایڈیشنوں کی کامیابی نے جموں و کشمیر کو سرمائی کھیلوں کے مرکز میں تبدیل کر دیا ہے۔انہوں نے کہا کہ 'تمام شراکت دار کھیلوں کے ہموار انعقاد اور بین الاقوامی معیار کی سہولیات دستیاب رکھنے کو یقینی بنانے کے لئے مقررہ ایکشن پلان کے ذریعے کام کو تیزی سے مکمل کریں'۔
بتادیں کہ کھیلو انڈیا سرمائی کھیلوں کا چوتھا ایڈیشن وادی کے شہرہ آفاق سیاحتی مقام گلمرگ میں 2 فروری شروع ہو رہا ہے۔حکام کے مطابق کھیلوں کے اس ایڈیشن میں قریب 8 سو کھلاڑیوں، عہدیداروں و میڈیا کے افراد وغیرہ کی شرکت متوقع ہے۔