جموں و کشمیر کے لیفٹیننٹ گورنر منوج سنہا نے جمعہ کو شیر کشمیر پولیس اکیڈیمی میں ڈپٹی ایس ایس پی کے 13 ویں اور پی ایس آئی کے 24 ویں بیچ کی پاسنگ آؤٹ پریڈ کی تقریب سے خطاب کیا۔
ایل جی نے کہا 'ورچول ورلڈ میں مجرمانہ عناصر ہمارے ملک کو میلی آنکھ سے دیکھ رہے ہیں۔ یہ ایک نئی جنریشن کا وار فیئر ہے اور اس میں مجرم قومی نہیں بلکہ بین الاقوامی سطح پر جڑے ہوئے ہیں، جس کا واحد مقصد غلط پروپیگنڈہ پھیلانا ہے اور امن، چین اور شانتی کو نقصان پہنچانا ہے'۔
لیفٹیننٹ گورنر نے کہا کہ گلوبل نیٹورک گروہ سے لڑنے میں کیمونیکیشن اور ٹیکنالوجی سے جڑے پولیس کے نوجوان ایک ملٹی پلیئر فورس کا کام کریں گے۔
انہوں نے کہا 'سائبر سکیورٹی کے شعبے میں پولیس پہلا ریسپانڈر بھی ہے اور ٹارگٹ بھی، آپ کو اپنے سائبر اثاثوں کو سنبھالنا بھی ہے اور باقی نظام کو بچانا بھی ہے۔ آپ لوگوں نے ایک سال کے کورس میں اس کے بارے میں کافی کچھ پڑھا ہوگا'۔
ان کا مزید کہنا تھا 'آنے والے وقت میں چیلنجز بدلتے رہیں گے، بنیادی پولیسنگ سے لے کر ڈارک ویب کرائم کی روک تھام اور فارنسک کے شعبوں میں آپ کا دائرہ کار بڑھتا جائے گا، اس کے لیے قوانین بنانا، منصوبہ بندی کرنا اور اس کے مطابق ایکشن پلان تیار کرنا اور اس کو عملانا عزم کئے بغیر ناممکن ہے'۔
