منوج سنہا نے سرینگر میں ملٹی لیول کار پارکنگ کا افتتاح کیا

’’پریس کالونی، سرینگر میں تعمیر کی گئی کار پارکنگ کے سبب سرینگر میں ٹریفک کے بڑھتے دباؤ اور پارکنگ کی قلت کے سبب لوگوں کو لاحق پریشانیوں سے نجات حاصل ہوگی۔‘‘

جموں و کشمیر کے لیفٹننٹ گورنر منوج سنہا نے پریس کالونی، سرینگر میں ملٹی لیول کار پارکنگ کا افتتاح کیا۔ قریب 27 کروڑ روپے کی لاگت سے تیار کی گئی کار پارکنگ میں چار سو سے زائد گاڑیوں جب کہ سو سے بھی زائد موٹر سائیکل/اسکوٹیز پارک کرنے کی گنجائش ہے۔

افتتاحی تقریب کے موقع پر سرینگر ڈیولپمنٹ اتھارٹی (SDA) کے ڈائریکٹر نے کہا کہ 2017 میں شروع کئے پروجیکٹ کے لیے اپریل 2020 ڈیڈ لائن مقرر کی گئی تھی تاہم نامساعد حالات اور بعد ازاں کورونا وائرس کے سبب تعمیراتی کام رک گیا تھا۔

انہوں نے مزید کہا کہ پریس کالونی میں تعمیر کی گئی پارکنگ کے سبب سرینگر میں ٹریفک کے بڑھتے دباؤ اور پارکنگ کی قلت کے سبب لوگوں کو لاحق پریشانیوں سے نجات حاصل ہوگی۔

انہوں نے عوام سے لال چوک اور گرد و نواح میں سڑکوں کے کنارے گاڑیاں پارک کرنے کے بجائے عوام کے لیے تعمیر کی گئی پارکنگ میں گاڑیاں پارک کرنے کی اپیل کی۔