سرینگر:جب چمڑے اور پلاسٹک کے جوتے دستیاب نہیں تھے یا صرف آسودہ حال لوگ ہی ایسے جوتے پہننے کی استطاعت رکھتے تھے تو اس زمانے میں عام لوگ چلنے پھرنے کے دوران کیسے اپنے پاؤں کو محفوظ رکھتے تھے۔ خاص طور پر کشمیر جیسے علاقے میں جہاں موسم سرما میں برف پر چلنے کی ضرورت بھی درپیش آتی ہو۔ حقیقت یہ ہے کہ سخت سردی اور برفباری میں بھی کشمیری لوگ چلتے پھرتے تھے اور ان کے پاس چمڑے اور پلاسٹک کے بوٹ بھی نہیں ہوتے تھے۔ اصل میں کشمیر کے لوگوں نے مقامی طور لکڑی اور گھاس سے بنے جوتے ایجاد کیے تھے جنہیں وہ استعمال میں لاتے تھے۔ لکڑے کے بنے جاتوں کو کھراو اور گھاس کے جوتوں کو پلہور کہا جاتا تھا۔
محمد یوسف بٹ، سرینگر کی مضافات میں واقع ضلع پلوامہ کے زنتراگ گاؤں کے رہنے والے ہیں ۔ یہ گاؤں پانپور علاقے میں واقع ہے۔ بٹ نے جموں و کشمیر کے محکمہ دستکاری کی مدد سے گھاس پھوس سے بننے والی روایتی گھریلو استعمال کی چیزوں کو ازسرنو زندہ کرنے کا بیڑہ اٹھایا ہے۔ وہ اپنے گھر میں پلہور بناتے ہیں۔ پلپور کے علاوہ وہ کئی دیگر اشیاء جیسے چٹائی، کپ کے لیے کور اور ٹوکریاں بنانے کے لیے گھاس کے تنکوں کا استعمال کرتے ہیں۔ انہوں نے یہ فن اپنے آباؤ اجداد سے سیکھا اور اس روایتی ثقافت کو زندہ رکھنے کی کوششوں پر محکمہ کا شکریہ ادا کیا۔ محمد یوسف بٹ کا کہنا ہے کہ وہ دھان کے گھاس سے چٹائیاں بناتے ہیں۔ ان کے مطابق جب فرنشنگ کیلئے جدید مصنوعات دستیاب نہیں تھیں تو لوگ گھروں میں گھاس کی انہی چٹائیوں پر بیٹھتے تھے۔ انہوں نے کہا کہ ایک گول چٹائی کو "چانگج" کہتے ہیں جبکہ مستطیل اور بڑی چٹائیاں "پتج" کہلاتی تھیں۔