Kokernag Encounter سبکدوش پولیس اور فوجی آفیسران مضروضوں پر مبنی قیاس آرائیوں سے اجتناب کریں،اے ڈی جی پی

کوگرناگ کے گڈول علاقہ میں عسکریت مخالف آپریشن چوتھے روز بھی جاری ہے ۔ اس انکاؤنٹر میں سکیورٹی فورسز کے چار اہلکار ہلاک ہوئے ہیں۔

سرینگر: ایڈیشنل ڈائریکٹر جنرل آف پولیس کشمیر رینج وجے کمار نے سبکدوش پولیس و فوجی آفیسران کو مشورہ دیا ہے کہ وہ مفروضوں پر مبنی قیاس آرائیوں سے گریز کریں۔

کشمیر پولیس زون نے ایکس پر اے ڈی پی وجے کمار کے حوالے سے لکھا کہ ”سبکدوش پولیس اور فوجی افسروں کو ' ایمبوش مفروضے' سے گریز کرنا چاہیے۔ “انہوں نے کہا کہ یہ ایک مخصوص ان پٹ کی بنیاد پر کیا گیا آپریشن ہے۔اے ڈی جی پی کے مطابق آپریشن جاری ہے اور پھنسے ہوئے تمام دو یا تین عسکریت پسندوں کو مار گرایا جائے گا۔بتادیں کہ گڈول کوکرناگ میں جاری تصادم کے بیچ کئی سابق پولیس اور فوجی آفیسران نے سوشل میڈیا سائٹوں پر پچھلے تین روز سے قیاس آرائیوں پر مبنی بیانات دے رہے ہیں۔

بتادیں کہ گڈول علاقہ ایک جنگلاتی علاقہ ہے۔ مذکورہ گاؤں گھنے جنگلات سے گھری ایک اونچی پہاڑی کے دامن میں واقع ہے۔ذرائع کے مطابق اُسی پہاڑی میں عسکریت پسندوں کی ایک کمین گاہ موجود ہے۔سکیورٹی فورسز کی جانب سے مذکورہ پہاڑی پر توجہ مرکوز کی گئی ہے اور مشکوک مقام پر لگاتار گولہ باری کی جارہی ہے۔اس آپریشن میں فوج کے اضافہ دستے قائم کئے گئے ہیں اور پہاڑوں پر چھڑنے کی مہارت رکھنے والے ماؤنٹین کلیمبرس فورس کی بھی مدد طلب کی گئی۔عسکریت پسندوں پر نظر رکھنے اور ان کا سراغ لگانے کے لئے ڈرون اور چاپرس کا استعمال بھی عمل میں لایا گیا ہے۔