Srinagar Witnessed Coldest Night of Season: سرینگر میں شبانہ درجہ حرارت منفی 5.5 ڈگری سیلسیس

وادی کشمیر میں گذشتہ کئی دنوں سے شبانہ درجہ حرارت مسلسل نقطہ انجماد سے نیچے درج کیا جا رہا ہے۔ سرینگر میں رواں موسم کی سرد ترین رات منفی 5.5 ڈگری سیلسیس جب کہ مشہور سیاحتی مقام پہلگام میں منفی 6.8 ڈگری سیلسیس ریکارڈ کیا گیا۔ Kashmir Night Temperature Below Freezing Point

سرینگر (جموں و کشمیر): کشمیر میں شبانہ درجہ حرارت میں مزید کمی واقع ہوئی ہے۔ گرمائی دارالحکومت سرینگر میں منفی 5.5 ڈگری سیلسیس کے ساتھ موسم کی سرد ترین رات ریکارڈ کی گئی۔ پہلگام، کوکرناگ، قاضی گنڈ، کپوارہ سمیت کئی دیگر علاقوں میں بھی موسم کی سرد ترین رات ریکارڈ کی گئی ہے۔ وادی کشمیر میں سبھی مقامات پر گزشتہ کئی دنوں سے شبانہ درجہ حرارت مسلسل نقطہ انجماد سے نیچے درج کیا جا رہا ہے۔

محکمہ موسمیات کے مطابق جنوبی کشمیر کے پہلگام علاقے میں سب سے کم درجہ حرارت منفی 6.8 ڈگری سیلسیس ریکارڈ کیا گیا۔ جنوبی کشمیر کے قاضی گنڈ میں رات کا درجہ حرارت منفی 4.4 ڈگری سیلسیس جبکہ کوکرناگ میں منفی 3.3 ڈگری سیلسیس درج کیا گیا۔ اعداد و شمار کے مطابق شمالی کشمیر کے کپوارہ ضلع میں بھی موسم کی سرد ترین رات منفی 5.1 ڈگری سیلسیس ریکارڈ کی گئی جب کہ مشہور سکی ریزورٹ گلمرگ میں درجہ حرارت منفی 5.2 ڈگری سیلسیس ریکارڈ کیا گیا۔

قابل ذکر یہ ہے کہ وادی کشمیر میں خشک موسم اور ٹھٹھرتی سردی کے بیچ 20 اور اور 21 دسمبر کی درمیانی شب سے سخت سردیوں کے چالیس دنوں پر محیط ’’چلہ کلان‘‘ کا آغاز ہوا۔چلہ کلان کو ’’شہنشہاہ زمستان‘‘ کے نام سے بھی جانا جاتا ہے جو کہ 21 دسمبر سے شروع ہو کر 30 جنوری کو اختتام ہو جاتا ہے۔