'کشمیر میں گورنر محض شراب پیتے اور گالف کھیلتے ہیں'

گوا کے گورنر ستیہ پال ملک نے کہا کہ 'کشمیر میں گورنر محض شراب پیتے اور گالف کھیلتے ہیں، جبکہ دوسری ریاستوں میں گورنرز آرام کرتے ہیں اور خود کو سیاست میں شامل نہیں کرتے ہیں'۔

گوا کے گورنر ستیہ پال ملک نے اتوار کے روز ایک بیان دیتے ہوئے گورنرز کے کردار کے متعلق سوال کھڑا کر دیا ہے اور یہ دعویٰ کیا ہے کہ گورنرز کے پاس کوئی کام نہیں ہوتا ہے۔

ستیہ پال ملک تحلیل شدہ ریاست جموں و کشمیر کے گورنر رہ چُکے ہیں۔

ستیہ پال ملک کو جموں و کشمیر کے گورنر کے عہدے سے اس وقت ہٹایا گیا جب مرکزی حکومت نے دفعہ 370 کو منسوخ کر کے ریاست کو مرکز کے زیر انتطام دو علاقوں میں تقسیم کر دیا۔ انہیں جموں و کشمیر سے منتقل کر کے گوا کا گورنر بنایا گیا۔

ستیہ پال ملک گزشتہ روز اپنے آبائی علاقے اترپردیش کے باغپت کے دورے پر تھے اور وہاں انہوں نے ایک خطاب میں کہا کہ 'گورنر کا کوئی کام نہیں ہوتا ہے'۔

انہوں نے کہا 'کشمیر کا گورنر شراب پیتا ہے اور گالف کھیلتا ہے۔ دوسری ریاستوں میں گورنر آرام کرتے ہیں اور خود کو سیاست میں شامل نہیں کرتے ہیں'۔

ستیہ پال ملک نے گوا کے گورنر کا عہدہ سنبھالنے کے بعد ایک خطاب کے دوران کہا تھا کہ بطور گورنر ان کا سابقہ عہدہ بہت ہی مشکل تھا تاہم میں اس کے ساتھ نپٹنے میں کامیاب رہا اور کامیابی کے ساتھ تمام امور کو حل کیا'۔