JK Opposition Parties Meet in Jammu: تین اکتوبر کو جموں میں اپوزیشن جماعتوں کا اجلاس

جموں کشمیر آل پارٹیز اپوزیشن گروپ کے ترجمان ایم وائی تاریگامی کا کہنا ہے کہ جموں میں فاروق عبداللہ کی رہائش گاہ پر اور ان کی زیر صدارت تین اکتوبر کو منعقد ہونے والی اپوزیشن کی میٹنگ میں سبھی اکائیوں کو دعوت دی گئی ہے۔ ذرائع سے معلوم ہوا ہے کہ یوٹی کی سیاسی صورتحال کے علاوہ اس میٹنگ میں انتخابات کے حوالہ سے بھی گفت و شنید ہوگی۔

سرینگر (جموں کشمیر) :جموں میں تین اکتوبر کو نیشنل کانفرنس کے صدر اور رکن پارلیمان ڈاکٹر فاروق عبد اللہ کی صدارت میں جموں کشمیر کی اپوزیشن جماعتوں کی متحدہ میٹنگ منعقد ہونے والی ہے۔ یہ میٹنگ جموں میں سابق وزیر اعلیٰ ڈاکٹر فاروق عبداللہ کی رہائش گاہ پر منعقد ہو رہی ہے جس میں سبھی اپوزیشن جماعتوں کے لیڈران کو مدعو کیا گیا ہے۔

سی پی آئی ایم کے لیڈڑ اور آل پارٹیز اپوزیشن گروپ کے ترجمان ایم وائی تاریگامی نے بتایا کہ اپوزیشن کی میٹنگ فاروق عبداللہ کی رہائش گاہ پر تین اکتوبر دن کے اڑھائے بجے منعقد کی جائے گی۔ تاریگامی نے بتایا کہ اس اتحاد کے تمام شرکاء لیڈران کو انہوں نے دعوت دی ہے۔ ذرائع نے بتایا کہ اس میٹنگ میں جموں کشمیر کی موجودہ سیاسی صورتحال اور انتخابات منعقد نہ کرانے پر گفتگو ہوگی۔

ذرائع کا مزید کہنا ہے کہ شرکاء میٹنگ میں ’’جموں کشمیر میں جمہوری نظام کا گلا گھوٹنے پر بحث کریں گے اور مرکزی سرکار کو باور کرائیں گے کہ جموں کشمیر میں کب تک عوام کو منتخب سرکار سے محروم رکھا جائے گا؟‘‘ غور طلب ہے کہ گزشتہ چند روز سے یہ خبریں گشت کرائی جا رہی ہیں کہ مرکزی سرکار جموں کشمیر میں بلدیاتی و پنچایتی انتخابات کو موخر کرے گی جس سے یہاں کی سیاسی جماعتوں میں تشویش پیدا ہوئی ہے۔

قابل ذکر ہے کہ اپوزیشن کے اس اتحاد میں نیشنل کانفرنس، پی ڈی پی، پردیش کانگرس کمیٹی، شیو سینا اور دیگر چھوٹی جماعتیں شامل ہیں۔ تاہم بی جے پی کے قریب سمجھی جانے والی جموں کشمیر اپنی پارٹی - جس کی صدارت الطاف بخاری کر رہے ہیں - اور غلام نبی آزاد کی ڈی پی اے پی اور سجاد لون کی پیپلز کانفرنس اس الائنس کا حصہ نہیں ہیں۔

اس الائنس نے جموں و سرینگر میں گزشتہ دو برسوں کے دوران متعدد اجلاس منعقد کئے جن میں حکمران جماعت بی جے پی کی سخت تنقید کی گئی۔ تاہم اس الائنس کے قیام سے پیپلز الائنس فار گپکار ڈکلریشن (پی اے جی ڈی) - جو دفعہ 370 کی منسوخی سے ایک روز قبل قائم کی گئی تھی جس کا ہدف جموں کشمیر کی خصوصی آئینی حیثیت کی بحالی کے لئے جدوجہد کرنا تھا - کو پس پردہ کر دیا گیا ہے۔