جموں وکشمیر عدالت عالیہ رواں ماہ کے آخر میں ہونے والی امر ناتھ یاترا پر آج سماعت کرے گی، گزشتہ روز ہوئی سماعت کے دوران جسٹس گیتا متل اور جسٹس سنجے دھر نے ایڈووکیٹ جنرل اسیم سہانی کو ایک تفصیلی رپورٹ پیش کرنے کو کہا تھا۔
رواں ماہ کے آخر میں امرناتھ یاترا کا انعقاد متوقع ہے، اس سے قبل جموں وکشمیر کی انتظامیہ نے اس سلسلے میں ایک رپورٹ تیار کی ہے جسے آج ہائی کورٹ میں پیش کیا جائے گا۔
امرناتھ یاترا کی تیاریوں سے متعلق ہو رہی اس سماعت میں آج جموں و کشمیر انتظامیہ کی جانب سے رپورٹ پیش کی جائے گی۔
قبل ازیں بنچ نے ہدایت نامہ جاری کرتے ہوئے کہا تھا کہ 'ہفتے کے روز تک انتظامیہ امرناتھ یاترا سے متعلق تفصیلی رپورٹ پیش کرے۔ کورٹ نے یہ بھی کہا تھا کہ یاترا کو بہتر انداز میں کرانے کے لیے کورونا کے تعلق سے کیا تیاریاں کی گئی ہیں، اور یاترا کے دوران مشتبہ افراد کو قرنطین کرنے اور ان کے علاج کے تعلق سے کیا انتظامات کیے گئے ہیں اس پر تفصیلی رپورٹ پیش کی جائے۔'
اس کے علاوہ عدالت نے سہانی کو جموں و کشمیر انتظامیہ کی جانب سے یاترا کے انعقاد اور تیاریوں کے حوالے سے کیے گئے فیصلے کی تفصیلات بھی طلب کی ہے۔