Waqf Board Cleanliness Drive: وقف بورڈ نے زیارتگاہوں پر چلائی صفائی مہم

جموں و کشمیر وقف بورڈ نے سرینگر کی معروف زیارتگاہوں - آستان عالیہ دستگیر صاحب اور زیارتگاہ مخدوم صاحب رحمہما اللہ تعالیٰ - پر خصوصی صفائی مہم شروع کی، اس مہم میں ایس ایم سی سمیت فائر اینڈ ایمرجنسی عملہ نے بھی وقف بورڈ کو تعاون پیش کیا۔

سرینگر:جموں و کشمیر وقف بورڈ نے فائر اینڈ ایمرجنسی سروسز اور سرینگر میونسپل کارپوریشن (ایس ایم سی) کے باہمی اشتراک سے زیارتگاہ حضرت مخدوم صاحب (رح) اور دستگیر صاحب (رح ) کی بڑے پیمانے میں صفائی مہم چلائی۔ اس صفائی مہم میں وقف بورڈ کی چیئرپرسن ڈاکٹر درخشاں اندرابی بھی شامل رہیں۔ وقف چیئرپرسن کے ہمراہ وقف بورڈ کے ممبران ڈاکٹر غلام نبی حلیم اور محمد سید حقانی بھی موجود تھے۔ وقف بورڈ نے جموں و کشمیر کی تمام درگاہوں پر ایک میگا صفائی پروگرام شروع کیا ہے، اسی طرح کی مہم چرار شریف اور پکھرپورہ درگارہوں پر بھی چلائی گئی۔

اس موقع پر وقف چیئرپرسن نے کہا کہ ’’صفائی نصف ایمان ہے اور اس طرح کے سوچھتا پروگرام صفائی کو ہماری اجتماعی عادت بنانے میں مدد کرتے ہیں۔‘‘ انہوں نے کہا درگاہیں اور خانقاہیں وہ مراکز ہیں جہاں روح اور دماغ کی اندرونی صفائی ہوتی ہے لیکن ہمیں ان عبادت گاہوں، زیارتگاہوں کو صاف ستھرا رکھنا چاہیے تاکہ اپنے اردگرد ایک پاکیزہ ماحول کو یقینی بنایا جا سکے۔

ڈاکٹر اندرابی نے فائر اینڈ ایمرجنسی سروسز اور سرینگر میونسپل کارپوریشن کی انتظامیہ کا بھی شکریہ ادا کیا جنہوں نے اس مہم میں وقف کو تعاون فراہم کیا۔ انہوں نے کہا کہ ’’عوامی تعاون کے بغیر کچھ بھی ممکن نہیں تھا، اس لیے ہم ہمیشہ زمینی سطح پر کسی بھی اہم تبدیلی کو نافذ کرنے کے لیے اجتماعی اقدامات پر یقین رکھتے ہیں۔‘‘ وقف چیئرپرسن نے مزید کہا کہ تاریخ میں کسی کو بھی اپنے فرائض میں کوئی کوتاہی برتنے کی اجازت نہیں دی جائے گی اور وقف بورڈ تمام درگاہوں پر زائرین کو بنیادی سہولتیں فراہم کرنے اور خدمات کو یقینی بنانے کا پابند ہے۔