غلام احمد میر نظر بند

جموں و کشمیر پردیش کانگریس کمیٹی کے صدرغلام احمد میر کو آج نظر بند کر دیا گیا ہے۔

وادی میں سیاسی رہنماؤں کے خلاف کارروائی کا سلسلہ اب بھی تھمنے کا نام نہیں لے رہا ہے جبکہ آج کانگریس پارٹی کے رہنما غلام احمد میر کو نظر بند کرنے کا حکم دیا گیا ہے۔ اس کے علاوہ ریاستی ترجمان رویندر شرما کو پولیس نے دوران پریس کانفرنس گرفتار کیا۔

قبل ازیں ریاست کے چیف سکریٹری سبرامنیم نے آج پریس کانفرنس میں کہا تھا کہ 'وادی میں حالات معمول پر آ رہے ہیں جبکہ آہستہ آہستہ تمام علاقوں سے بندشیں اور پابندیاں ہٹائی جائیں گی۔'

جموں و کشمیر پردیش کانگریس کمیٹی کے ریاستی ترجمان رویندر شرما کو آج پولیس نے دوران پریس کانفرنس گرفتار کیا۔

پولیس نے رویندر شرما سے کہا کہ 'سینیئر پولیس افسر نے انہیں طلب کیا ہے اور کچھ بات کرنا چاہتے ہیں، اتنا کہتے ہوئے پولیس نے انہیں زبردستی اٹھایا اور گاڑی میں بٹھا کر لے گئی۔'