مرکز کے زیر انتظام جموں و کشمیر کے سرینگر شہر میں جمعرات کو پردیش کانگریس کمیٹی کی طرف سے سابق وزیر اعظم آنجہانی راجیوں گاندھی کو ان کے 76 ویں یوم پیدائش پر خراج عقیدت پیش کیا گیا۔
سرینگر میں واقع کانگریس دفتر پر ایک تقریب کا انعقاد کیا گیا جس میں کانگریس کے جموں و کشمیر کے صدر غلام احمد میر کے علاوہ سینئر لیڈارن اور متعدد کارکنان نے شمولیت کی۔
اس دوران آنجہانی راجیو گاندھی کی تصویر پر گلباری کی رسم بھی انجام دی گئی۔
اس موقعے پر میڈیا سے بات کرتے ہوئے غلام احمد میر نے راجیو گاندھی کو شاندار الفاظ میں خراج عقیدت پیش کرتے ہوئے مرکز میں برسر اقتدار بی جے پی سرکار پر الزام عائد کرتے ہوے کہا کہ ’’جموں و کشمیر کی خصوصی حیثیت دفعہ 370کو غیر آئینی طور پر ختم کرکے ریاست کو دو حصوں میں تقسیم کیا گیا۔‘‘
خصوصی حیثیت کے خاتمے سے متعلق میر کا کہنا تھا کہ ’’کانگریس پارٹی پہلے سے ہی اس فیصلے کے خلاف ہے اور تب تک اس غیر آئینی فیصلے کے خلاف جدوجہد جاری رکھے گی جب تک ریاست کی خصوصی حیثیت کو بحال نہ کیا جائے گا۔‘‘