بے رحمی کے ساتھ صحافیوں کو نشانہ بنایا جارہا ہے: عمر عبداللہ

جموں و کشمیر کے گرمائی دارالحکومت سرینگر میں صحافیوں کو محرم کے جلوس کی عکس بندی کرنے کے دوران پولیس کی جانب سے مارپیٹ کرنے کی سیاسی جماعتوں نے شدید الفاظ میں مذمت کی ہے۔

سابق وزیر اعلیٰ اور نیشنل کانفرس کے نائب صدر عمر عبد اللہ نے کہا کہ ’’صحافیوں کو پولیس جس بے رحمی سے مارپیٹ کر رہی ہے یہ بے حد افسوسناک ہے۔‘‘

عمر عبداللہ نے ٹویٹ کے ذریعے صحافیوں کو عتاب کا نشانہ بنانے کی مذمت کرتے ہوئے کہا: ’’صحافی محض اپنا کام کر رہے تھے اور خبروں کی اطلاع دینا انکا کام ہے، وہ مصنوعی خبر نہیں بناتے نہ ہی واقعات کو انجینئر کرتے ہیں، بلکہ خبروں کی عکس بندی اور واقعات کو رپورٹ کرتے ہیں۔‘‘

عمر عبداللہ کا ٹویٹ

انہوں نے ایل جی منوج سنہا کی جانب سے اس واقعے کی نوٹس لینے اور دوبارہ ایسا نہ ہونے کی امید ظاہر کی۔

پیپلز کانفرنس نے صحافیوں کی مار پیٹ پر اپنا ردعمل ظاہر کرتے ہوئے کہا کہ ’’صحافیوں کی بے رحمانہ طریقے سے مار پیٹ کرنا قابل مذمت ہے۔‘‘

پیپلز کانفرنس کا ٹویٹ

انکا کہنا تھا کہ پیپلز کانفرنس ایسے واقعات - جن میں صحافیوں کو پولیس بغیر کسی احتساب کے بار بار مارپیٹ کر رہی ہے - پر شدید تشویش کا اظہار کرتی ہیں۔

انہوں نے مزید کہا کہ ’’تعجب ہے کہ قانون کے رکھوالے ہی قانون کو مسمار کرنے کے لئے نکلے ہیں۔‘‘

قابل ذکر ہے کہ سرینگر کے جہانگیر چوک میں محرم کے جلوس کی عکس بندی کے دوران مقامی پولیس نے صحافیوں پر لاٹھیاں برسائیں، جس میں ایک فوٹو جرنلسٹ زخمی ہوا ہے اور انکا کیمرا بھی توڑا گیا۔

اس واقعے کی ایک ویڈیو وائرل ہوئی ہے جس میں ایک مقامی پولیس اسٹیشن میں بطور ایس ایچ او تعینات پولیس افسر کو صحافیوں کی لاٹھی سے مارپیٹ کرتے ہوئے دیکھا جا سکتا ہے۔