SMHS Hospital: لاعلاج بیماروں کیلئے سرینگر صدر ہسپتال کا درد کی نگہداشت کا شعبہ آخری امید

ڈاکٹر رخسانہ نجیب نے کہا کہ جان لیوا بیماریوں جیسے کینسر میں مبتلا مریضوں میں درد بے قابو ہوتا ہے تو ان کا مارفین Morphine سے درد کم کیا جاتا ہے۔ وہیں کمر درد ، آسٹو پورسیز اور ادویات سے ٹھیک نہ ہونے والے دیگر قسم کے درد سے راحت دینے کی خاطر دیگر ٹیکنیز اور تھرپیز کو استعمال میں لایا جاتا ہے۔

سرینگر:ایس ایم ایچ ایس ہسپتال سرینگر میں قائم درد کو بے اثر کرنے کا شعبہ یعنی Pain and Palliative Care سخت درد سے جوجھ رہے مریضوں کو راحت پہنچانے میں ان دنوں ایک اہم رول ادا کررہا ہے۔ سکمز صورہ کے بعد اس نوعیت کا یہ دوسرا شعبہ ہے جو کہ کینسر اور دیگر قسم کے درد میں مبتلا مریضوں کو کسی حد تک سکون پہنچا رہا ہے۔

ایس ایم ایچ ایس اہسپتال کے شعبہ pain and Palliative care کے کام کاج اور مریضوں کے لیے دستیاب سہولیات کے بارے میں ای ٹی وی بھارت کے نمائندے پرویز الدین نے شعبہ Anesthesiology Critical Care and Pain Management کی سربراہ ڈاکٹر رخسانہ نجیب سے خصوصی گفتگو کی۔

انہوں نے کہا کہ ایس ایم ایچ ایس ہسپتال میں اگرچہ Pain and Palliative care شعبے کو اپریل 2019 میں قائم کیا گیا لیکن اس شعبہ نے باضابطہ طور 2020 سے اپنا کام کرنا شروع کیا۔ ایسے میں یہ یونٹ کچھ عرصے کے دوران ہی مریضوں کی کی توجہ کا مرکز بن گیا ہے اور صرف 7 ماہ کے دوران 700 سے زائد کینسر مریضوں سمیت 7200 مریضوں کے درد کو دور کر کے راحت پہنچائی ہے۔

ایک سوال کے جواب میں ڈاکٹر رخسانہ نجیب نے کہا کہ جان لیوا بیماریوں جیسے کینسر میں مبتلا مریضوں میں درد بے قابو ہوتا ہے تو ان کا مارفین Morphine سے درد کم کیا جاتا ہے۔ سرطان سے متاثر مریضوں کے اعضاء میں سخت درد ہوتا ہے اور ایسے مریضوں کو مارفین دے کر ان کا درد کم کرکے انہیں تھوڑا سا سکون فراہم کرنے کی کوشش کی جاتی ہے۔

وہیں کمر درد ، آسٹو پورسیز اور ادویات سے ٹھیک نہ ہونے والے دیگر قسم کے درد سے راحت دینے کی خاطر دیگر ٹیکنیز اور تھرپیز کو استعمال میں لایا جاتا ہے۔ انہوں نے کہا کہ ہمارے پاس او پی ڈی میں 6 بستروں پر مشتمل وارڈ موجود ہے جہاں ایک تھیٹر بھی ہے جن مریضوں کا درد ادویات سے دور نہیں ہوتا، انہیں تھرپی دینی پڑتی ہے اور اس کے لیے مختلف طریقے موجود ہیں۔ انہوں نے کہا کہ جان لیوا امراض میں مبتلا مریضوں کے ناقابل برداشت درد کو دور کرنے کے شعبہ کو بطور تربیتی سینٹر کے طور پر بھی منظوری مل گئی ہے۔

انہوں نے کہا کہ پورے ملک میں امسال 10سنٹرز کو عملے کی تربیت دینے کی اجازت دی گئی ہے جن میں جی ایم سی سرینگر کا یہ سنٹر بھی شامل کیا گیا اور اس کے لیے ایمز سے سرٹیفیکیٹ بھی حاصل ہوگئی ہے۔ ڈاکٹر رخسانہ نے کہا کہ ایس ایم ایچ ہسپتال میں شعبہ pain and palliative care قائم ہونے سے سکمز صورہ میں مریضوں کا بوجھ کافی حد تک کم ہوا ہے کیونکہ درد سے جوجھ رہے جو کینسر مریض وہاں جاتے تھے، ان میں بیشتر بیمار درد سے راحت پانے کے لیے ایس ایم ایچ ایس ہسپتال ہی آتے ہیں۔

بات چیت کے دوران ڈاکٹر صاحبہ نے انستھیسیا اور درد کی نگہداشت شعبہ کے کام کاج اور دیگر سہولیات کے بارے میں تفصیلات فراہم کی وہیں انہوں نے وہ خدمات بھی گنوائیں جو ایس ایم ایچ ایس ہسپتال کا شعبہ انستھیسیا جی ایم سی سے منسلک دیگر ہسپتالوں جیسے سی ڈی ہسپتال۔ بون اینڈ جوائنٹ۔ لل دید ہسپتال اور سپر اسپیشلیٹی انجام دے رہے ہیں۔