سری نگر: جموں وکشمیر کے عوام گذشتہ برسوں سے سخت ترین صورتحال سے گزررہے ہیں اور اس دوران لوگوں کی اقتصادی اور معاشی حالت کو بہت بڑا دھچکا لگا ہے۔موجودہ وقت میں جہاں لوگوں کو راحت پہنچانے کیلئے عوام دوست اقدامات کی ضرورت تھی وہیں اس کے برعکس انتظامیہ ایسے فیصلے تھوپنے میں لگی ہوئی ہے جس سے عوام کے مشکلات میں مزید اضافہ ہورہاہے۔ ان باتوں کا اظہار نیشنل کانفرنس ترجمانِ اعلیٰ تنویر صادق نے آج نوشہرہ میں پارٹی وروکروں کے ایک اجلاس سے خطاب کرتے ہوئے کیا۔
انہوں نے کہا کہ حالیہ ایام میں بلڈوزر مہم، پراپرٹی ٹیکس اور بجلی فیس میں اضافے نے یہ بات صاف کردی ہے کہ موجودہ انتظامیہ کسی بھی زاویئے سے عوام دوست نہیں ہے۔ ایک ایسے وقت میں جب جموں وکشمیر کے عوام سخت ترین اقتصادی بدحالی کے شکار ہیں، پراپرٹی ٹیکس کا اطلاق سراسر ناانصافی اور عوام کُش اقدام ہے۔ان کا کہنا تھا کہ ہر طرف سے عوام پر اضافی بوجھ بڑھایا جارہاہے۔ بجلی فیس میں بے تحاشہ اضافے نے بھی لوگوں کی کمر توڑ کر رکھ دی ہے۔انہوں نے کہا کہ حکومت اسمارٹ میٹر اور انسولیٹڑ ترسیلی لائینیں بچھا رہی ہے، یہ بات طے ہے کہ اس سے کافی حد تک بجلی کا زیاں کم ہوگا اور ایسے میں بجلی فیس میں کمی لانے کے بجائے اضافہ کرنا سمجھ سے بالاتر ہے۔