سرینگر:کُل جماعتی حریت کانفرنس نے ایک انٹریو کے دوران لیفٹننٹ گورنر منوج سنہا کی جانب سے دیے گئے اس بیان پر حیرت اور افسوس کا اظہار کیا جس میں موصوف نے واضح الفاظ میں اس بات کی تردید کی ہے کہ حریت چیئرمین میر واعظ عمر فاروق اگست 2019 سے گھر میں نظر بند نہیں ہیں بلکہ ان کے گھر کے باہر فورسز کی گاڑیوں اور اہلکاروں کو موصوف کی حفاظت کے لیے تعینات کیا گیا ہے۔ LG Manoj Sinha on Mirwaiz Umar Farooq House Arrest
حریت کانفرنس نے واضح کیا کہ یہ ایک صریح جھوٹ اور ناقابل یقین بیان ہے جب کہ حقیقت یہ ہے کہ میرواعظ کو گزشتہ تین برسوں سے مسلسل خانہ نظر بند رکھا گیا ہے۔ حالانکہ جموں و کشمیر کے تمام مذہبی علماء سمیت دیگر تمام طبقات کی طرف سے حکام سے بار بار کی اپیلوں اور التجا کے باوجود موصوف کو اپنے گھر سے باہر آنے کی اجازت نہیں دی جا رہی ہے اور دنیا بھر کے اخبارات اور الیکٹرانک میڈیا کی رپورٹیں اس بات کی گواہ ہیں۔ Hurriyat Conference Refuted LG's Statement
حریت کانفرنس نے کہا کہ اگر اب حکام میر واعظ کو رہا کرنا چاہتے ہیں تو یہ ایک خوش آئند قدم ہے تاہم اپنی فضیحت چھپانے کے لیے اس طرح کے بیانات دینا حد درجہ شرارت آمیز اور افسوسناک ہے کیونکہ اس طرح کے بیانات کا مقصد رائے عامہ کو گمراہ کرنے اور قیادت کے تئیں عوام میں بداعتمادی پیدا کرنے کی ایک مذموم کوشش ہے۔ بیان میں کہا گیا کہ میرواعظ نے نہ تو آج اور نہ ہی ماضی میں کبھی کسی سے سکیورٹی مانگی ہے۔