بیرونِ ریاست سے خریدی گئی گاڑیوں کے مالکان کے لیے بڑی راحت

جموں و کشمیر ہائی کورٹ نے بیرون ریاست سے خریدی گئی گاڑیوں کے مالکان کے لیے بڑی راحت دیتے ہوئے آر ٹی او کشمیر کی جانب سے جاری کے گئے سرکلر کو گزشتہ روز کالعدم قرار دیا۔

ایک طرف عدالت کے اس فیصلے سے عوام کو ہو رہی مشکلات کا ازالہ ہوا ہے تو وہیں اس سرکلر کے خلاف عدالت کا رخ کرنے والے درخواست گزار ایڈوکیٹ ظہور احمد بٹ کا ماننا ہے کہ 'وہ عوام کے حقوق کے لیے مستقبل میں بھی عدالت کا رخ کرتے رہیں گے'۔

ایڈوکیٹ ظہور احمد بٹ کا کہنا ہے کہ 'عدالت کی ڈویژن بینچ نے گزشتہ روز ایک تاریخی فیصلہ سنایا۔ اس معاملے کی سماعت بھی فاسٹ ٹریک پر کی گئی۔ ہم عدالت کے فیصلے سے مطمئن ہیں اور آج سپریم کورٹ میں اپیل بھی دائر کیا ہے تاکہ اگر جموں و کشمیر انتظامیہ عدالت عظمیٰ کا رخ کرے تو ہمیں قبل از وقت اطلاع ہو جائے۔'

معاملے کی تفصیلات فراہم کراتے ہوئے انہوں نے کہا کہ 'گزشتہ ماہ جب آر ٹی او کشمیر نے سرکلر جاری کیا تھا تو اس کے فوراً بعد ہی پولیس نے گاڑیاں ضبط کرنی شروع کر دیں۔ ایک روز ہم نے دیکھا کہ ایک بیمار شخص کی گاڑی ضبط کی گئی جس کے بعد اُن کو پبلک ٹرانسپورٹ میں سفر کرنا پڑا۔ یہ دیکھ کر ہم نے ارادہ کرلیا تھا کہ عدالت کا رخ کرنا ہے اور رواں ماہ کی 3 تاریخ کو عدالت میں عرضِی دائر کی گئی'۔

اُن کا مزید کہنا تھا کہ 'عدالت میں سماعت کے دوران آر ٹی او کشمیر اور کمشنر سیکریٹری ٹرانسپورٹ کو طلب بھی کیا گیا تھا۔ تاہم عدالت اُن کے جواب سے مطمئن نہیں ہے۔ جواب دہندگان کی جانب سے ایڈوکیٹ جنرل ڈی سی رینا نے عدالت کو یقین دلایا کہ کوئی بھی گاڑی ضبط نہیں کی جائے گی جب تک معاملے پر فیصلہ نہ آجائے۔ عدالت نے معاملے پر آخری سماعت رواں ماہ کی 22 تاریخ کو کر کے اپنا فیصلہ محفوظ کیا۔'

انہون نے مزید کہا کہ 'ہمیں پورا یقین تھا کہ فیصلہ ہمارے حق میں آئے گا، لیکن اگر فیصلہ کچھ اور ہوتا تو ہم عدالت عظمیٰ کا رخ کرنے کے لیے بھی تیار تھے۔ آج ہی ہم نے عدالت عظمیٰ میں اپیل دائر کی ہے تاکہ اگر جموں و کشمیر انتظامیہ وہاں جائے تو ہمیں پتہ چلے۔'

انہوں نے کہا کہ 'گاڑیوں کے اندراج کے اختیار آر ٹی او کشمیر کے پاس نہیں ہے اور اُن کی جانب سے جاری کیا گیا سرکلر موٹر وہیکل ایکٹ کے خلاف ہے۔'

عدالت نے یہ بھی واضح کر دیا کہ 'دہرا ٹیکس عائد کرنا آئین کے خلاف ہے۔ اس کے علاوہ عدالت نے اپنے فیصلے میں واضح کیا ہے کہ اگر کوئی شخص اپنا رہائشی پتہ تبدیل کرتا ہے تو اس کو دوبارہ اندراج کرنا ہے لیکن اسے کوئی ٹیکس ادا نہیں کرنا ہوگا۔ گاڑی کا رجسٹریشن نمبر تبدیل کرنا گاڑی کے مالک کی مرضی ہے۔ گاڑی کا اندراج صرف ایک بار ہوتا ہے۔'

واضح رہے کہ گزشتہ ماہ کی 27 تاریخ کو آر ٹی او کشمیر نے ایک حکم نامے کے ذریعے باہر سے لائی گئی گاڑیوں کے مالکان کو دوبارہ اندراج کرنے کا فرمان جاری کیا تھا جس کے بعد ہزاروں گاڑیاں ضبط کی گئیں۔ پھر رواں ماہ کی 3 تاریخ کو ایڈوکیٹ ظہور احمد بٹ نے عدالت کا رخ کیا تھا عدالت میں سات بار سماعت کے بعد ڈویژن بینچ نے اپنے فیصلے کو محفوظ رکھنے کا فیصلہ کیا۔