سرینگر: جنوبی اور شمالی کشمیر کے متعدد علاقوں میں موسلا دھار بارشوں کے بیچ زور دار ژالہ بھاری ہوئی جس وجہ سے کھڑی فصلوں اور میوہ باغات کو نقصان پہنچا ہے۔اطلاعات کے مطابق جمعے کی سہ پہر کو جنوبی اور شمالی کشمیر میں موسم نے کروٹ لی جس کے ساتھ ہی شدید ژالہ بھاری کا سلسلہ شروع ہوا۔
معلوم ہوا ہے کہ اننت ناگ ، کولگام اور بارہمولہ کے ٹنگمرگ کے کئی دیہی علاقوں میں شدید ژالہ بھاری سے کھڑی فصلوں، میوہ باغات اور سبزی باغوں کو کافی نقصان پہنچا ہے۔ذرائع نے بتایا کہ ژالہ بھاری سے کھڑی فصلوں کو بے تحاشہ نقصان پہنچا اور میوہ جات بشمول سیب، ناشپاتی، خوبانی وغیرہ کے باغوں کو بھی نقصان پہنچنے کی اطلاعات موصول ہوئی ہے۔مقامی لوگوں نے بتایا کہ ژالہ بھاری اس قدر شدید تھی کہ زمین پر سفید پرت جمع ہوئی ۔ان کے مطابق کافی دیرتک ژالہ بھاری کی وجہ سے باغات کو نقصان پہنچا ہے۔عوامی حلقوں نے حکومت سے مطالبہ کیا ہے کہ متاثرہ علاقوں میں نقصان کا تخمینہ لگا کر کسانوں اور باغ مالکان کو فوری طورپرمعاوضہ فراہم کیا جائے۔