انتظامیہ کی جانب سے ضروری اشیاء کی ہوم ڈیلیوری

جموں و کشمیر انتظامیہ نے لوگوں کو راحت پہنچانے کے لیے بعض ڈپارٹمنٹل اسٹورز کو کھانے پینے کی اشیاء اور دیگر ضروری سامان صارفین کے گھروں تک پہنچانے کی ذمہ داری دے دی ہے۔

کورونا وائرس کے خطرات اور خدشات کے پیش نظر جہاں ملک بھر میں تمام طرح کی کاروباری سرگرمیاں معطل ہیں وہیں یونین ٹریٹری جموں و کشمیر میں دوائی کی دکانیں چھوڑ دیگر تمام دکانیں بند ہیں۔

ادھر وادی کشمیر میں مہلک وبائی بیماری کے پھیلاؤ کو روکنے کے لیے مسلسل لاک ڈاؤن کی وجہ سے شہرو دیہات میں کریانہ دکانیں بھی بند رکھنے کے ہدایات ہیں۔

ایسے میں کئی جگہوں پر لوگوں کو کھانے پینے کی اشیاء کی دستیابی کے حوالے سے کئی دشواریاں کا سامنا بھی ہے۔لیکن اب انتظامیہ نے لوگوں کو راحت پہچانے کے لیے بعض ڈیپارٹمنٹل سٹورز کو کھانے پینے کی اشیاء اور دیگر ضروری سامان صارفین کے گھروں تک پہنچانے کی ذمہ داری دے دی ہے۔

ضلع مجسٹریٹ سرینگر نے نیشنل ڈیزاسٹر منیجمنٹ ایکٹ 2005 کے تحت اس حوالے سے احکامات بھی جاری کئے ہیں۔وہیں اس تعلق سے ضلع انتظامیہ نے شہر سرینگر میں قائم کئی ڈیپارٹمنٹل سٹورز کے ذمہ یہ کام سونپا ہے اور اسٹورز کے ناموں کے ساتھ ساتھ دوکانوں کے موبائل اور واٹس ایپ نمبرات بھی مشتہر کئے ہیں تاکہ صارفین آرڈر لکھوا کر، واٹس یا مسیج کرکے اپنی ضرورت کا سامان گھر پر منگوا سکے۔

اس ضمن میں دوکانداروں کا کہنا ہے کہ سماجی دوری کی برقراری کے ساتھ تقسیم کاری کا عمل جاری ہے۔ فون،مسیج یا واٹس ایپ کے زریعے موصول شدہ لسٹ کے مطابق اشیاء ضروریہ کا سامان لوگوں کے گھروں کی دہلیز تک پہنچایا جارہا ہے۔

ڈیپارٹمنٹل اسٹور ضروری سامان گھروں تک پہچانے کے لیے ان دوکانداروں کو ضلع انتظامیہ کی جانب سے کرفیو پاس بھی جاری کئے گئےڈیپارٹمنٹل سٹور کے منیجر کاکہنا ہے دن بھر 90 سے 100تک آرڈر موصول ہوتے رہتے ہیں اور آئے روز ان میں اضافہ ہوتا جارہا ہے۔

وہیں ان کی بھی یہی کوشش رہتی ہے کہ اشیاء ضروریہ زیادہ سے زیادہ گھروں تک پہنچ پائے ۔

ڈیپارٹمنٹل سٹورانتظامیہ کی جانب سے اس طرح کے اقدام سے لاکڈاون کے دوران لوگوں خاص کر ریڈزون علاقوں میں رہنے والوں کو کافی راحت ملی رہی ہے وہیں ان کریانہ فروشوں کا کام کاج بھی کسی حد شروع ہو پایا ہے۔