Grandson of Sheikh Syed Abdul Qadir Jeelani نواسہ حضرت شیخ سید عبدالقادر جیلانیؒ نے دستگیر صاحب خانیار میں حاضری دی

سید ہاشم گیلانی بغداد سے تین روزہ دورے پر کشمیر وارد ہوئے ہیں۔ اتوار کے روز انہوں نے شاہ جیلان کانفرنس میں بھی شرکت کی تھی ۔

سرینگر: جموں وکشمیر کی گرمائی دارالحکومت سرینگر میں دستگیر صاحب خانیار کے آستانہ عالیہ پر پیر کے روز نواسہ حضرت شیخ سید عبدالقادرجیلانیؒ سید ہاشم گیلانی نے حاضری دی اور امن و سلامتی کے لئے خصوصی دعا کی۔جموں وکشمیر وقف بورڈ کی چیئرپرسن ڈاکٹر درخشاں اندرابی اور سیکریٹری ٹورازم عابد شاہ نے سید ہاشم گیلانی کا آستانہ عالیہ پر استقبال کیا۔ سید ہاشم گیلانی کو دیکھنے کے لئے لوگوں کی ایک بڑی تعداد دستگیر صاحب خانیار میں صبح سے ہی انتظار کر رہی تھی۔

اطلاعات کے مطابق کشمیر کے دورے پر آئے ہوئے نواسہ حضرت شیخ سید عبدالقادر جیلانیؒ سید ہاشم گیلانی نے پیر کے روز پیر دستگیر صاحب کے آستانہ عالیہ واقع خانیار میں حاضری دی۔معلوم ہوا ہے کہ سید ہاشم گیلانی کی دستگیر صاحب خانیار میں آمد کے پیش نظر سکیورٹی کے غیر معمولی انتظامات کیے گئے تھے۔آستانہ عالیہ پر حاضری کے بعد نامہ نگاروں سے مختصر بات چیت کے دوران سید ہاشم گیلانی نے کہا کہ یہاں پر آکر بہت خوشی ہوئی اور عالم انسانیت کے لئے دعا کی۔جموں و کشمیر وقف بورڈ کی چیئرپرسن ڈاکٹر درخشاں اندرابی نے اس موقع پر کہا کہ نواسہ حضرت شیخ سید عبدالقادر جیلانیؒ نے دستگیر صاحب آستانہ عالیہ پر حاضری دی اور کشمیر میں امن و ترقی اور خوشحالی کی دعا کی۔ انہوں نے بتایا کہ اس سے ایک اچھا پیغام جائے گا ۔

درخشاں اندرابی نے بتایا کہ منگل کے روز وقف بورڈ کی جانب سے نئے لاگو کی رسم رونمائی نواسہ دستگیر صاحب کے ہاتھوں ہی ہوگی ۔دریں اثنا دستگیر صاحب خانیار سرینگر میں نواسہ شاہ جیلانیؒ کو دیکھنے کے لئے لوگوں کی ایک بڑی تعداد امڑ پڑی تھی ۔واضح رہے کہ سید ہاشم گیلانی بغداد سے تین روزہ دورے پر کشمیر وارد ہوئے ہیں۔ اتوار کے روز انہوں نے شاہ جیلان کانفرنس میں بھی شرکت کی تھی ۔

(یو این آئی)