شیخ مصطفیٰ کمال نے کہا کہ مرکزی حکومت اور مقامی انتظامیہ نے گزشتہ برس کورونا وائرس کی پہلی لہر سے کوئی بھی سبق حاصل نہیں کیا اور ایک برس کے دوران شعبہ صحت کو فروغ دینے کے لیے کوئی بھی ٹھوس اقدام نہیں کیا گیا۔
انہوں نےکہا کہ اگرچہ حکومت دعوے کررہی ہے کہ وینٹی لیٹرز، آکسیجن، بیڈز، ادویات اور ویکسینز کی کوئی قلت نہیں ہے لیکن زمینی سطح پر ہسپتالوں میں یہ سب دستیاب نہیں ہے۔ آکسیجن کی حصولیابی کے لیے تیمار داروں کو زبردست کوفت کا سامنا کرنا پڑرہا ہے۔
ڈاکٹر کمال نے مزید کہا کہ حکومت دعوے کر رہی ہے کہ ویکسین کی کوئی قلت نہیں ہے۔ اگر واقعی ایسا ہے تو طبی مراکز کے باہر 'ویکسین آوٹ آف اسٹاک' بورڈ چسپاں کیوں ہیں۔ ڈاکٹر کمال نے حکومت پر زور دیا کہ وہ کاغذی گھوڑے دوڑانے اور زبانی جمع خرچ کی پالیسی کو ترک کرکے عملی طور عوام کی راحت رسانی کے لیے اقدامات کرے۔
انہوں نے مرکزی حکومت سے اپیل کی کہ وہ موجودہ صورتحال کے دوران پاکستان کی جانب سے ملنے والی مدد کو قبول کرے۔ انہوں نے کہا کہ پاکستان کی امداد کی پیشکش صرف ادویات اور دیگر ساز و سامان کی فراہمی ہی نہیں بلکہ دوستی کی پہل سمجھ کر قبول کیا جانا چاہیے۔
