ریاض نائیکو کے بعد غازی حیدر بنا حزب کمانڈر

سیکیورٹی فورسز نے ریاض نائیکو کو گزشتہ ہفتے پلوامہ ضلع میں اپنے ہی آبائی گاؤں بیگ پورہ میں ایک تصادم میں ہلاک کیا تھا- پولیس نے اس ہلاکت کو اہم کامیابی قرار دے کر کہا تھا کہ اس سے کشمیر میں عسکریت پسندی کو دھچکہ لگے گا۔

گزشتہ ہفتے وادیٔ کشمیر میں سرگرم عسکریت پسند تنظیم حزب المجاہدین کے مطلوب ترین کمانڈر ریاض نائیکو کی ہلاکت کے بعد اس تنطیم نے 'غازی حیدر' نامی عسکریت پسند کو نیا آپریشنل کمانڈر مقرر کیا ہے۔

حزب کے ترجمان سیلم ہاشمی نے کشمیر میں ایک خبر رساں ایجنسی کو بتایا کہ یونایٹڈ جہاد کونسل کے چیف سید صلاح الدین کی صدارت میں میٹنگ کی گئی جس میں غازی حیدر کو نیا آپریشنل چیف کمانڈر جبکہ ظفر الاسلام کو نائب کمانڈر اور ابو طارق کو اعلیٰ فوجی مشیر مقرر کیا گیا ہے۔

'غازی حیدر' جزب کے نئے کمانڈر ہوں گے: حزب ترجمان

غور طلب ہے کہ ریاض نائیکو کو گزشتہ ہفتے بدھ کو پلوامہ ضلع میں اپنی ہی آبائی گاؤں بیگ پورہ میں ایک تصادم میں ہلاک کیا گیا تھا- پولیس نے اس ہلاکت کو اہم کامیابی قرار دے کر کہا تھا کہ اس سے کشمیر میں عسکریت پسندی کو شدید دھچکہ لگے گا۔ ریاض نائیکو گزشتہ 8 برسوں سے عسکریت میں سرگرم تھا اور برہان وانی کی ہلاکت کے بعد تین برس تک حزب کمانڈر رہا تھا۔پولیس ذرائع کا کہنا ہے کہ نیا کمانڈر 'غازی حیدر' دراصل ضلع پلوامہ کے ملنگ پورہ گاؤں سے تعلق رکھنے والا سیف اللہ نامی عسکریت پسند ہے جو گزشتہ 6 برسوں سے سرگرم ہے اور ریاض نائیکو کا قریبی ساتھی مانا جاتا ہے۔