Altaf Bukhari on G 20 summit جی ٹوئنٹی ممبران کشمیر کے متعلق ٹراویل ایڈوائزری ختم کریں گے، الطاف بخاری

جموں و کشمیر کے سرینگر میں 22 تا 24 مئی جی ٹوئنٹی سمٹ کا انعقاد ہونے جارہا ہے۔ اس معاملہ پر جموں و کشمیر اپنی پارٹی کے سربراہ الطاف بخاری کا کہنا ہے کہ یہ ایک خوش آئند قدم ہے۔

سرینگر:جموں کشمیر اپنی پارٹی کے صدر الطاف بخاری نے کہا کہ جی ٹوئنٹی کی میزبانی کشمیر کے لیے خوش آئند قدم ہے اور امید ہے کہ جن ممالک نے کشمیر کے متعلق ٹراویل ایڈوائزری جاری کر رکھی ہے وہ اسے ختم کریں گے اور اپنے شہریوں کو کشمیر آنے کی اجازت دیں گے۔ الطاف بخاری نے اگرچہ جموں و کشمیر میں جی ٹوئنٹی سمٹ کی میزبانی کا خیر مقدم کیا ہے لیکن خطہ کی دیگر سیاسی جماعتیں بشمول پی ڈی پی اور نیشنل کانفرنس نے اس پر تنقید کی ہیں۔

الطاف بخاری نے آج سرینگر میں اپنی پارٹی کے دفتر پر میڈیا کے نمائندوں سے بات کرتے ہوئے کرناٹک میں ہوئے اسمبلی انتخابات میں کانگریس کی شاندار کامیابی پر کہا کہ انتخابات میں کسی جماعت کی جیت نہیں ہوتی ہے بلکہ جمہوریت کی جیت ہوتی ہے۔ انہوں نے کہا کہ جب بھی کشمیر میں اسمبلی انتخابات ہوں گے تو اپنی پارٹی کسی جماعت کے ساتھ اتحاد کر کے انتخابات نہیں لڑے گی بلکہ علیحدہ انتخابات میں حصہ لے گی۔

غور طلب ہے کہ سرینگر میں 22 تا 24 مئی سے بین الاقوامی ممالک کی جی ٹوئنٹی کا اجلاس منعقد ہورہا ہے جو بلواڈ روڈ پر واقع ایس کے آئی سی سی میں منعقد کیا جارہا ہے۔ اس سمٹ میں جی ٹوئنٹی ممالک کے مندوبین حصہ لے رہے ہیں جہاں وہ عالمی سطح پر موسمی تبدیلی، انسداد دہشت گردی، معاشی سست روی سے نمٹنے کے لئے لائحہ عمل اور دیگر ضروری اقدامات کرنے پر تبادلہ خیال کریں گے۔

جی ٹوئنٹی میں دنیا کے بیس بڑے ممالک بشمول ارجنٹینا، آسٹریلیا، برازیل، کینیڈا، چین، جرمنی، فرانس، بھارت، انڈونیشیا، اٹلی، جاپان، میکسیکو، روس، سعودی عرب، جنوبی افریقہ، جنوبی کوریا، ترکی، برطانیہ جیسے ممالک شامل ہیں۔ان ممالک کے ممبران وادی میں منعقد ہونے والی سمٹ میں حصہ لینے والے ہیں۔