Kashmir Weather Update کشمیر کے گلمرگ میں برفباری، ایک فٹ سے زائد برف جمع

محکمۂ موسمیات کے ایک ترجمان کے مطابق وادیٔ کشمیر میں نو سے 11 فروری تک ہلکی برف باری کا امکان ہے۔ وہیں گلمرگ میں تازہ بارف باری سے ایک فٹ سے زائد برف جمع ہو گیا ہے۔ Weather forecast in Kashmir

سری نگر:وادیٔ کشمیر کے مشہور سیاحتی مقام گلمرگ میں دوران شب زائد از ایک فٹ تازہ برف جمع ہوئی جبکہ سری نگر سمیت دیگر علاقوں میں بارشیں ہوئیں۔ محکمۂ موسمیات کے ایک ترجمان کے مطابق وادی میں پیر کی دوپہر سے موسم میں بتدریج بہتری واقع ہونے کی توقع ہے۔ انہوں نے کہا کہ 7 اور 8 فروری کو موسم جزوی طور پر ابر آلود رہ سکتا ہے۔ ان کا کہنا تھا کہ بعد ازاں وادی میں 9 سے 11 فروری تک ہلکی سے درمیانی درجے کی برف باری کا امکان ہے۔ سری نگر میں گزشتہ چوبیس گھنٹوں کے دوران 5.2 ملی میٹر بارش ریکارڈ ہوئی ہے اور قاضی گنڈ میں 5.6 مل میٹر بارش ریکارڈ ہوئی ہے جبکہ سیاحتی مقام گلمرگ میں 1.14 فٹ، پہلگام میں 2.0 سینٹی میٹر اور کپوارہ میں 5.0 سینٹی میٹر تازہ برف جمع ہوئی ہے۔

دریں اثنا وادی میں مطلع ابر آلود رہنے سے شبانہ درجۂ حرارت میں مزید بہتری واقع ہوئی ہے۔ گرمائی دارلحکومت سری نگر میں کم سے کم درجۂ حرارت 1.8 ڈگری سینٹی گریڈ ریکارڈ کیا گیا جہاں گزشتہ شب بھی یہی درجۂ حرارت ریکارڈ ہوا تھا۔ سری نگر میں 5 جنوری کو رواں سیزن کی سرد ترین رات ریکارڈ ہوئی تھی جب کم سے کم درجۂ حرارت منفی 6.4 ڈگری سینٹی گریڈ ریکارڈ ہوا تھا۔ وادی کے مشہور زمانہ سیاحتی مقام گلمرگ میں کم سے کم درجۂ حرارت منفی 3.6 ڈگری سینٹی گریڈ ریکارڈ کیا گیا جہاں گزشتہ شب کا درجۂ حرارت منفی 6.4 ڈگری سینٹی گریڈ ریکارڈ ہوا تھا۔

وادی کے دوسرے مشہور سیاحتی مقام پہلگام میں کم سے کم درجۂ حرارت منفی 0.2 ڈگری سینٹی گریڈ ریکارڈ کیا گیا جہاں گزشتہ شب کا درجۂ حرارت منفی 5.4 ڈگری سینٹی گریڈ ریکارڈ ہوا تھا۔ سرحدی ضلع کپوارہ میں کم سے کم درجۂ حرارت منفی0.3 ڈگری سینٹی گریڈ ریکارڈ کیا گیا جہاں گزشتہ شب کا درجۂ حرارت 2.9 ڈگری سینٹی گریڈ ریکارڈ ہوا تھا۔ گیٹ وے آف کشمیر کے نام سے مشہور قصبہ قاضی گنڈ میں کم سے کم درجۂ حرارت منفی1.6 ڈگری سینٹی گریڈ ریکارڈ کیا گیا جہاں گزشتہ شب کا درجۂ حرارت 0.4 ڈگری سینٹی گریڈ ریکارڈ ہوا تھا۔ لداخ یونین ٹریٹری کے ضلع کرگل میں کم سے کم درجۂ حرارت منفی14.0 ڈگری سینٹی گریڈ ریکارڈ کیا گیا جبکہ ضلع لیہہ میں کم سے کم درجۂ حرارت منفی 9.5 ڈگری سینٹی گریڈ ریکارڈ ہوا تھا۔

یو این آئی