سرینگر (نیوز ڈیسک) :ایڈیٹرز گِلڈ آف انڈیا (ای جی آئی) نے قومی تحقیقاتی ایجنسی (این آئی اے) کی جانب سے کشمیری صحافی عرفان معراج کی گرفتاری پر تشویش کا اظہار کرتے ہوئے کہا کہ ’’صحافیوں کو یو اے پی اے کے تحت گرفتار کرنا زیادتی ہے۔‘‘ ای جی آئی نے عرفان معراج کی گرفتاری پر بیان جاری کرتے ہوئے کہا کہ ’’میڈیا کی آزادی کو آئے روز کمزور کیا جا رہا ہے۔‘‘
ای جی آئی نے اپنے بیان میں کہا ہے کہ ’’جموں کشمیر کی انتظامیہ کو جمہوری اقدار کا احترام کرنا چاہئے اور صحافیوں کو ہراساں کرنا بند کیا جانا چاہئے۔‘‘ یہ بیان ای جی آئی صدر سیما مصطفیٰ، جنرل سیکریٹری اننت ناتھ اور خزانچی شری رام پوار کی جانب سے جاری کیا گیا ہے۔ غور طلب ہے کہ این آئی اے نے نوجوان صحافی عرفان معراج کو دو روز قبل سرینگر سے گرفتار کیا اور یو اے پی اے قانون کے تحت ٹیرر فنڈنگ کا مقدمہ عائد کرکے جیل بھیج دیا۔
آین آئی اے نے عرفان پر الزام عائد کیا ہے کہ عرفان معراج انسانی حقوق کارکن خرم پرویز کی این جی او جموں کشمیر کولیشن آف سیول سوسائٹز سے منسلک تھا جو ٹرر فنڈنگ میں ملوث ہے۔ خرم پرویز کو بھی اسی مقدمے میں این آئی اے نے 2021 میں گرفتار کیا تھا اور اس وقت وہ قید میں ہے۔ عرفان ضلع سرینگر کے پادشاہی باغ کے رہائشی ہیں اور نیوز ویبسائٹ ’’ٹو سرکلرز ڈاٹ نیٹ‘‘ کے آن لائن مدیر تھے۔ وہ کئی بین الاقوامی میڈیا اداروں کے ساتھ فری لانس کام بھی کر رہے تھے۔