سیاسی مفادات کے لیے منشیات فروشی کو فروغ دیا گیا، درخشاں اندرابی

جموں و کشمیر خاص کر وادی میں منشیات مخالف سرگرمیوں میں جہاں انتظامیہ خاص کر پولیس کی جانب سے منشیات فروشوں کے خلاف سخت کارروائیاں انجان دی جا رہی ہیں وہیں غیر سرکاری تنظیمیں بھی آگاہی پروگرامز اور ریلیز کا انعقاد کر رہی ہیں۔ Darakhshan Andrabi on Drug Menace

سرینگر (جموں و کشمیر):جموں و کشمیر وقف بورڈ کی چیئرپرسن ڈاکٹر درخشاں اندرابی نے بدھ کو سرینگر کی نمائش گاہ میں ایک غیر سرکاری تنظیم ’’سیو کشمیر‘‘ کی جانب سے منعقدہ انسداد منشیات بیداری پروگرام میں شرکت کرکے جموں و کشمیر خاص کر وادی میں منشیات کے بڑھتے رجحان پر گہری تشویش کا اظہار کرتے ہوئے معاشرے کے ہر طبقے کو منشات مخالف سرگرمیوں میں شرکت کرکے نئی نسل کو برباد ہونے سے بچانے میں اپنا کلیدی کردار ادا کرنے کی تلقین کی۔

سیو کشمیر کی جانب سے منعقدہ اس بیداری پروگرام میں جہاں اسکولی بچوں سمیت مختلف شعبہ ہائے زندگی سے تعلق رکھنے والے نوجوانوں نے شرکت کی وہیں اس موقع پر خطاب کرتے ہوئے اندرابی نے کہا: ’’منشیات کی اس لت کو کشمیر میں ان لوگوں نے متعارف کرایا، جو تین دہائیوں سے زیادہ عرصے سے کشمیری نوجوانوں کو پتھر پھینکنے پر مجبور کرتے رہے اور نوجوانوں کی ہلاکت کے ذمہ دار ہیں۔‘‘

اندرابی نے نام لیے بغیر سابق حکومتوں کو تنقید کا نشانہ بناتے ہوئے کہا: ’’تین دہائیوں تک کشمیر میں تشدد کو فنڈ کرنے کا سب سے بڑا ذریعہ منشیات کا کاروبار تھا۔ اس دور میں اقتدار میں رہنے والوں نے اس بدنام صنعت (نارکو ٹیررزم) کی حمایت کی اور منشیات سے جڑے منشیات فروشوں کو اپنے سیاسی فائدے کے لیے استعمال کیا۔ اس گٹھ جوڑ نے ہمارے نوجوانوں کا مستقبل تباہ کر دیا ہے۔‘‘

وقف چیئرپرسن نے دعویٰ کیا کہ وہ گزشتہ ایک دہائی سے زائد عرصے سے اس تباہ کن صورتحال کے بارے میں ہر جگہ اپنی آواز بلند کر رہی ہیں تاہم ’’سیاسی مفادات رکھنے والے لوگوں نے مداخلت نہ کرنے کا تہیہ کر رکھا ہے۔‘‘