Yogotsov in Srinagar آیوش نے منایا سرینگر میں یوگا اتسو

محکمہ آیوش اور یوتھ سروسز اینڈ اسپورٹس کے باہمی اشتراک سے انڈور اسپورٹس اسٹیڈیم، سرینگر، میں ’’یوگا اتسو‘‘ کی نسبت سے تقریب کا انعقاد کیا گیا۔

سرینگر (جموں و کشمیر) :محکمہ آیوش کی جانب سے ’’یوگا اتسو‘‘ کی نسبت سے ایک خصوصی تقریب کا انعقاد عمل میں لایا گیا۔ جس میں سیکریٹری ہیلتھ ڈاکٹر بھوپندر کمار اور ڈائریکٹر آیوش، موہن سنگھ سمیت محکمہ صحت کے کئی دیگر افسران و عملہ نے شرکت کی۔ اس موقع پر مختلف کھیلوں سے وابستہ کھلاڑیوں نے بھی منعقد کیے گئے یوگا پروگرام میں شرکت کی۔

منتظمین کے مطابق 21 جون کو عالمی یوگا دن کی نسبت سے بھارت بھر میں یوگا کے 100خصوصی سیشنز منعقد کیے جا رہے ہیں جس میں ایک سرینگر اور ایک جموں میں منعقد ہونے طے ہوئے ہیں۔ اور 31مئی کو اسی اثنا میں ڈائریکٹر آیوش اور یوتھ اسپورٹس اینڈ سروسز کے باہمی اشتراک سے سرینگر کے انڈور سپورٹس کمپلیکس، سرینگر میں یوگا اتسو منایا گیا۔ اس اتسو میں یوتھ یوتھ سپورٹس سروسز سے وابستہ درجنوں کھلاڑیوں کے علاوہ ڈائریکٹریٹ آف آیوش سے وابستہ متعدد ملازمین اور ڈاکٹرز شامل تھے

یوگا اتسو کے حاشیہ پر نامہ نگاروں کے ساتھ بات کرتے ہوے سیکریٹری ہیلتھ، ڈاکٹر بھوپندر کمار، نے کہا کہ ’’21 جون کو منعقد ہونے والے عالمی یوگا ڈے کی نسبت سے تیاریوں کو حتمی شکل دینے کی غرض سے بھارت بھر میں اس طرح کے یوگا پروگرامز کا انعقاد کیا جا رہا ہے۔‘‘ انہوں نے کہا کہ یوگا سے نہ صرف ایک انسان جسمانی طور تندرست رہتا ہے بلکہ یوگا سے ذہنی طور پر انسان فِٹ رہتا ہے۔‘‘ انہوں نے یوگا کی اہمیت و افادیت کا تذکرہ کرتے ہوئے کہا کہ ’’یوگا آج کے دور میں ہر ایک کے لیے لازمی بن چکا ہے۔ مشغول اور مصروف لیل و نہار میں ایک انسان کے لیے یوگا جسمانی و ذہنی تندرستی کا ضامن ہے۔‘‘