جموں و کشمیر میں مذہبی اور سماجی مقامات پر کووڈ ٹیسٹنگ مراکز قائم کرنے کی ہدایت

جموں و کشمیر میں کورونا وائرس کے مثبت معاملات میں گذشتہ چند دنوں سے اضافہ درج کیا جا رہا ہے۔ گذشتہ 8 روز کے دوران موذی وائرس کے سبب 3 افراد کی موت واقع ہوئی ہے۔

ڈائریکٹر ہیلتھ سروسز کشمیر نے وادی کشمیر کے سبھی چیف میڈیکل افسران، سپر انٹنڈنٹس اور بلاک میڈیکل افسران کو ہدایت دی ہے کہ وہ کووڈ 19 کے مثبت معاملات میں اضافے کے پیش نظر سماجی، مذہبی مقامات پر کووڈ ٹیسٹنگ مراکز قائم کریں تاکہ وائرس کے پھیلاؤ کو روکا جا سکے۔

ڈائریکٹر ہیلتھ سروسز نے شادی بیاں کی تقاریب منعقد کرنے کے مقامات پر بھی ٹیسٹنگ سنٹرس قائم کرنے کی ہدایت دی ہے۔

ڈائیریکٹر ہیلتھ سروسز کشمیر ڈاکٹر مشتاق احمد راتھر کی جانب سے جاری کئے گئے حکمنامے میں متعلقہ صحت افسران سے کہا گیا ہے کہ ’’جن مقامات پر ٹیسٹنگ سنٹر قائم کرنے کی ضرورت محسوس ہو، وہاں پر ٹیسٹنگ مراکز قائم کئے جائیں اور اس ضمن میں ایک مربوط پلان مرتب کر کے ڈائریکٹر ہیلتھ سروسز کو بھی آگاہ کیا جائے۔‘‘

قابل ذکر ہے کہ جموں و کشمیر میں عالمی وبا کورونا وائرس کے مثبت معاملات میں گذشتہ چند دنوں سے اضافہ درج کیا جا رہا ہے۔ گزشتہ 8روز کے دوران کورونا وائرس سے 3افراد کی موت واقع ہوئی ہے۔ اس سے قبل 31اکتوبر کو جموں وکشمیر میں 4 افراد اس مہلک وائرس کی زد میں آکر اپنی جانیں گنوا بیٹھے تھے۔

جموں و کشمیر میں اب تک اس موذی وائرس کے سبب ساڑھے چار ہزار کے قریب افراد فوت ہو چکے ہیں۔

واضح رہے کہ شہر سرینگر میں کورونا مثبت معاملات میں اضافے کے پیش نظر ضلع انتظامیہ سرینگر نے پیر کے روز سرینگر کے 15 علاقوں میں 10 دنوں کے لیے بندشیں نافذ کرنے کے احکامات صادر کیے ہیں۔