سرینگر:سی آر پی ایف کے سربراہ سیوجے لال تھاسین نے اتوار کے روز سرینگر کے کئی علاقوں کا دورہ کیا اور بچشم خود سکیورٹی صورتحال کا جائزہ لیا۔معلوم ہوا ہے کہ ڈائریکٹر جنرل آف سی آر پی ایف نے ایک اعلیٰ سطحی میٹنگ کی بھی صدارت کی۔ اطلاعات کے مطابق ڈائریکٹر جنرل آف سی آر پی ایف نے اتوار کے روز سرینگر کے کئی علاقوں کا دورہ کرنے کے موقع پر سکیورٹی صورتحال کے بارے میں آگاہی حاصل کی۔ذرائع نے بتایا کہ سی آر پی ایف سربراہ نے پائین شہر کا بھی دورہ کیا، جس دوران انہیں سی آر پی ایف کی تعیناتی کے بارے میں بھی جانکاری فراہم کی گئی۔
ذرائع کے مطابق سی آر پی ایف چیف نے عیدگاہ میں قائم سی آر پی ایف کیمپ کا دورہ کیا اور وہاں پر تعینات جوانوں سے گفت وشنید کی۔ سی آر پی ایف سربراہ نے سرینگر میں پیرا ملٹری فورس کے سینئر آفیسران کے ساتھ میٹنگ کی، جس دوران انہیں سرینگر میں سی آر پی ایف کی تعیناتی کے بارے میں مکمل جانکاری فراہم کی گئی۔اس موقع پر سی آر پی ایف چیف نے پیرا ملٹری فورسز کے آفیسران کو ہدایت دی کہ وہ چوبیس گھنٹے متحرک رہے۔