امرناتھ پوجا دوردرشن پر براہ راست نشر کرنے کی تجویز

سالانہ امرناتھ یاترا کا انعقاد کرنے والے شری امرناتھ شرائن بورڈ نے یاترا کے دوران پوجا ارچنا کو براہ راست نشر کرنے کے لئے دور درشن سے رجوع کیا ہے۔ جموں کشمیر میں امرناتھ یاترا آئندہ مہینے سے شروع ہونے کے امکانات ہیں۔

دوردرشن سرینگر کو شری امرناتھ شرائن بورڈ کی جانب سے موصول ہوئی تجویز کے مطابق صبح اور شام آدھے گھنٹے دوردرشن نیشنل پر یاترا کے دوران پوجا کو براہ راست نشر کیا جانا ہے۔

دور درشن کیندر سرینگر کے پروگرامنگ ہیڈ جی ڈی طاہر نے ای ٹی وی بھارت کو بتایا کہ ’’شری امرناتھ شرائن بورڈ کی جانب سے ہمیں تجویز موصول ہوئی ہے۔ ڈی ڈی نیشنل پر براہ راست نشر کیے جانے کی بات چل رہی ہے اور ہو سکتا ہے کہ ڈی ڈی کشیر پر بھی نشر کیا جائے۔ تاہم اس ضمن میں حتمی فیصلہ دوردرشن کے ہیڈ آفس میں لیا جائے گا۔‘‘

ان کا مزید کہنا تھا کہ ’’اس بار عالمی وبا کورونا وائرس کی وجہ سے یاتریوں کی تعداد میں کمی کی گئی ہے۔ اسی لئے اس تجویز کو سامنے لایا گیا ہے۔ ابھی تجویز پر غور و فکر جاری ہے کوئی حتمی فیصلہ نہیں کیا گیا ہے۔‘‘

جہاں عالمی وبا کورونا وائرس کی وجہ سے سالانہ حج اور دیگر مذہبی تقاریب پر پابندی عائد کی گئی ہے وہیں سالانہ امرناتھ یاترا کے انعقاد پر بھی غور و فکر جاری ہے۔

سری نگر انتظامیہ کے ایک سینئر افسر کا کہنا تھا کہ ’’یاترا کی تاریخ ابھی مقرر نہیں کی گئی ہے۔ ابھی تک جو اطلاعات موصول ہو رہی ہیں اس کے مطابق آئندہ مہینے کی 21 تاریخ کو شروع ہوکر اگست مہینے کے پہلے ہفتے میں اختتام پذیر ہونے کے امکانات ہیں۔ اس بار یاترا صرف 15 دنوں تک ہی ہوگی اور صرف بالہ تل کے راستے سے مقدس گپھا جانے کی اجازت ہوگی۔‘‘

ان کا مزید کہنا تھا کہ ’’جہاں تک پوجا ارچنا کی بات ہے تو وہ آئندہ مہینے کی 5 تاریخ سے اگست کی تین تاریخ تک صبح شام کی جائے گی۔‘‘