سرینگر میں سائیکل ریس 2020 کا اہتمام

تقریب کے دوران جموں و کشمیر پولیس کے سربراہ دلباغ سنگھ نے کہا کہ 'کھیل کود کی سرگرمیاں منعقد کرنے سے نوجوان تشدد کے راستے سے دور ہو سکتے ہیں۔'

جموں و کشمیر کے ضلع سرینگر میں جھیل ڈل کے ساحل پر آج پولیس نے 'پیڈل فار پیس' کی تقریب کا اہتمام کیا، اس دوران درجنوں لڑکے اور لڑکیوں نے سائیکل ریس 2020 میں حصہ لیا۔

لیفٹیننٹ گورنر منوج سنہا کے مشیر کے کے شرما اور پولیس سربراہ دلباغ سنگھ نے اس سائیکل ریس کا افتتاح کیا۔ اس دوران پولیس سربراہ دلباغ سنگھ نے کہا کہ نوجوان لڑکوں اور لڑکیوں کو اس تقریب میں شرکت کرتے ہوئے انہیں اچھا محسوس ہو رہا ہے۔ یہ خوش آئند بات ہے کہ نوجوان اس میں جوش و جذبے سے شرکت کر رہے ہیں۔

مشیر کے کے شرما کا کہنا ہے کہ 'ایسی تقریبات اور کھیل کود کی سرگرمیاں منعقد کرنا انتظامیہ کی کوشش رہے گی تا کہ نوجوانوں کے ساتھ رابطہ برقرار رہے۔'

ریس کے اختتام پر جموں و کشمیر کے لیفٹیننٹ گورنر منوج سنہا نے کامیاب کھلاڑیوں میں انعامات تقسیم کئے اور ان کی ستائش کی۔