نوجوان فنکاروں نے بکھیرے موسیقی کے الگ الگ رنگ

دارالحکومت سرینگر کے ٹیگور ہال میں جموں وکشمیر اکیڈمی آف آرٹ، کلچر اینڈ لنگویجز نے ابھرتے نوجوان فنکاروں کے لیے "پھلون گلاب " کے نام سے تمدنی پروگرام کا اہتمام کیا۔

تفصیلات کے مطابق اس خصوصی پروگرام میں وادی کے مختلف اضلاع سے آئے ہوئے 30سال تک کی کم کمر کے نوجوان فنکاروں نے لوک موسیقی، کلاسکی، صوفیانہ موسیقی، غزل ، قوالی اور لائٹ موسیقی کے رنگ حاضرین کے سامنے پیش کئے۔

اس تمدنی پروگرام میں کلچرل اکیڈمی کے کئی عہدیداروں ، وادی کشمیر کے نامور گلوکاروں اور تھیٹر سے وابستہ فنکاروں کے علاوہ شائقین موسیقی کی اچھی خاصی تعداد نے شرکت کی۔

کلچرل اکیڈمی کی جانب سے منعقدہ اس پروگرام میں فن کے الگ الگ زمروں میں نوجوان فنکاروں نے اپنی بہترین کارکردگی کا مظاہرہ کرتے ہوئے حاضرین سے دادو تحسین بھی حاصل کی۔

اس موقع پر یہاں کے نامور گلوکاروں نے کلچرل اکیڈمی کی اس کوشش کو کافی سراہا ہے اور کہا کہ فن کے میدان میں ابھرتے ہوئے ان نوجوانوں کی حوصلہ افزائی کے لیے اس طرح کے پروگرام کافی اہمیت کے حامل ہیں ۔جن کو مستقبل میں بھی جاری رکھنے کی ضرورت ہے۔

"پھلون گلاب" پروگرام میں حصہ لینے والے نوجوان گلوکاروں نے خوشی کا اظہار کیا اور کہا کہ وادی کے معروف فنکاروں اور موسیقی کاروں کے سامنے کوئی نغمہ پیش کرنا ایک الگ ہی تجربہ ہے۔

تاہم انہوں نے کہا کہ اس نوعیت کی تقریبات میں شرکت کرنے سے نہ صرف حوصلہ بلکہ بہت کچھ سیکھنے کو بھی موقع ملتا ہے۔

وادی کشمیر کے نوجوانوں میں قابلیت اور صلاحت کی کوئی کمی نہیں ہے لیکن اگر کمی ہے تو وہ ہے بہتر پلیٹ فارم مہیا کرانے کی۔

کلچرل اکیڈمی کے سیکریٹر منیر الاسلام کا کہنا ہے کہ اکیڈمی کا مقصد علم و ادب کوفروغ دینے کے ساتھ ساتھ یہاں کے ابھرتے نوجوان فنکاروں کے فن کو بھی دوسروں تک پہنچانا ہے۔تاکہ آگے جاکے انہیں بہتر سے بہتر فلیٹ فارم مہیا ہوسکے۔