کورونا وائرس: سری نگر میں لوگوں سے تجاویز طلب

کورونا وائرس کے بیچ گزر اوقات کرنے کے لئے لوگوں سے تجاویز طلب کرتے ہوئے ضلع مجسٹریٹ سری نگر ڈاکٹر شاہد اقبال چودھری نے کہا ہے کہ زمینی سطح پر کام کرنے والے ساتھیوں کے بھر پور تعاون سے ہم ضلع کے 13 ریڈ زونوں میں عائد پابندیاں ہٹا پائے ہیں۔

ضلع مجسٹریٹ سری نگر ڈاکٹر شاہد اقبال چودھری نے کہا ہے کہ کورونا وائرس کے بیچ زندگی بسر کرنے کے لئے ہم تمام متعلقین اور تاجر برادری کے نمائندے کے ساتھ رابطے میں ہیں تاکہ ایک منصوبہ تشکیل دیا جا سکے۔

شاہد اقبال چودھری نے اپنے ایک ٹویٹ میں کہا ’’وائرس کے بیچ زندگی بسر کرنے کے لئے ہم تمام متعلقین اور تاجر برادری کے نمائندوں کے ساتھ رابطے میں ہیں تاکہ ایک منصوبہ بنایا جا سکے۔ سری نگر مخصوص تجاویز کا خوش آمدید ہے۔‘‘

انہوں نے اپنے ایک اور ٹویٹ میں کہا ’’سری نگر کے 13 ریڈ زونوں میں حدودی پابندیوں کو ہٹایا گیا۔ عوام الناس اور زمینی سطح پر کام کرنے والے ساتھیوں کا مشکور ہوں۔‘‘

بتا دیں کہ ایک تفصیلی جائزے اور کورونا وائرس کی روک تھام کی کوششوں کے جامع تجزیے کے بعد ضلع ڈیزاسٹر منیجمنٹ اتھارٹی سری نگر نے ضلع میں تیرہ ریڈ زونوں سے حدودی پابندیاں ہٹانے کو منظوری دی ہے۔