کورونا وائرس کے مسائل پر مشاورتی کمیٹی تشکیل

جموں و کشمیر کی انتظامیہ نے عالمی وبا کورونا وائرس کی وجہ سے پیدا شدہ طبی مسائل سے متعلق ایک مشاورتی کمیٹی تشکیل دی ہے۔

تین ماہ گزرنے کے بعد جموں وکشمیر انتظامیہ نے کورونا وائرس سے پیدا طبی مسائل اور دیگر لوازمات سے متعلق طبی ماہرین کی ایک مشاورتی کمیٹی تشکیل دی ہے جس کی صدارت کشمیر کے معروف ڈاکٹر محمد سلطان خورو کریں گے۔

کورونا وائرس مسائل پر مشاورتی کمیٹی تشکیل

اس کمیٹی کے دیگر ممبران میں سکمز (SKIMS) صورہ کے ناظم عبد الغنی آہنگر، پرنسپل گورنمنٹ میڈیکل کالج جموں اور سرینگر، ڈاکٹر راجندر سنگھ، سابق پرنسپل جموں میڈیکل کالج، ڈاکٹر جاوید ملک، سکمز بمنہ میڈیکل کالج کے شعبہ پلمونولاجی کے سر پرست، ڈاکٹر انیل شرما، سرپرست شعبہ ادویات گورنمنٹ میڈیکل کالج جموں، ڈاکٹر نوید نذیر سرپرست شعبہ چسٹ ڈیزیز، گورنمنٹ میڈیکل کالج سرینگر، ڈاکٹر اعجاز نبی کول سکمز صورہ، ڈاکٹر سمرتی گھلاٹی کے علاوہ ڈاکٹر راہل گپتا شامل ہیں۔

انتظامیہ کا کہنا ہے کہ یہ مشاورتی کمیٹی کووڈ19 سے پیدا شدہ طبی مشکلات، قواعد و ضوابط او دیگر امور پر جائزہ لینے کے علاوہ حکومت کو مشاورت فراہم کرے گی۔

یہ کمیٹی کووڈ19 کے پھیلاؤ کے تین ماہ بعد تشکیل دی گئی ہے جس پر کئی طبی و عوامی حلقوں نے تنقید کرتے ہوئے کہا کہ اس کو کووڈ 19 کے پھیلاؤ سے قبل تشکیل دینے کی ضرورت تھی۔

لوگوں کا کہنا ہے انتظامیہ کی جانب سے یہ قدم بہت دیر کے بعد اٹھایا گیا ہے جب وائرس ہر علاقے میں پھیل چکا ہے۔