کشمیر: گوشت کی قیمتوں کے پر تعطل برقرار

وادی کشمیر میں گوشت کی قیمتوں سے متعلق انتظامیہ اور قصابوں، کوٹھداروں کے مابین نا اتفاقی کے پیش نظر قصابوں کی ہڑتال جاری ہے۔

گوشت کی قیمتوں کو لیکر مٹن ڈیلران اور انتظامیہ کے درمیان رسی کشی کے نتیجے میں قصابوں کی جانب سے مسلسل ہڑتال سے عام لوگوں کو پریشانیوں کا سامنا کرنا پڑ رہا ہے۔

محکمہ امور صارفین نے وادی کشمیر میں گوشت کی قیمت 450سے480 روپے فی کلو مقرر کی تھی تاہم قصاب 600 روپے فی کلو کے حساب سے فروخت کر رہے تھے۔ جس کے بعد انتظامیہ نے کئی دکانوں کو سربمہر کرکے متعدد کے خلاف کیس بھی درج کیے۔ اس صورتحال کے بعد گوشت فروشوں نے نرخوں میں اضافے کی مانگ کو لیکر ہڑتال شروع کی جو گزشتہ قریب چار ہفتوں سے جاری ہے۔

ذرائع کے مطابق اس ضمن میں اب تک مٹن ڈیلران اور انتظامیہ کے مابین بات چیت ہوئی تاہم کوئی مثبت نتیجہ اب تک سامنے نہیں آیا۔

گوشت فروشوں کے مطابق انہیں مال پنجاب و دہلی کی منڈیوں سے لانا پڑتا ہے، تاہم متعدد جگہوں پر ٹیکس اور کرائے کے سبب وہ گورنمٹ کی جانب سے مشتہر کردہ نرخوں پر گوشت فروش نہیں کر سکتے۔

گوشت کی دکانیں مسلسل بند ہونے سے لوگوں خاص کر مریضوں کو دقتوں کا سامنا کرنا پڑ رہا ہے۔