سرینگر: سرینگر کے مضافاتی علاقہ ہمہامہ میں واقع بارڈر سکیورٹی فورس (بی ایس ایف) کے سبسڈری ٹریننگ سینٹر پر ہفتے کے روز 115 ریکروٹ کانسٹیبلوں کی پاوسنگ آؤٹ پریڈ منعقد ہوئی۔اس پریڈ کے دوران ملک بھر سے تعلق رکھنے والے پاس آؤٹس نے پوری لگن کے ساتھ ملک کی خدمت کرنے کا حلف اٹھایا۔ اس موقع پر بی ایس ایف کشمیر فرنٹئر کے انسپکٹر جنرل (آئی جی) اشوک یادو مہمان خصوصی کی حیثیت سے موجود تھے۔انہوں نے اپنے خطاب میں بھرتی ہونے والے اہلکاروں کی خود اعتمادی، مہارت اور ہم آہنگی کی سراہنا کی جو اس پریڈ کا خاص حصہ تھا۔
انہوں نے ریکروٹ ہونے والے اہلکاروں کو ہمت اور جذبے کے ساتھ ملک کی خدمت کرنے کی تاکید کی۔موصوف آئی جی نے کمانڈنٹ ایس ٹی سی بی ایس ایف کشمیر اور تدریسی عملے کو کامیاب کوششوں اور تربیت حاصل کرنے والوں کو وسیع تربیت فراہم کرنے اور انہیں مختلف سرحدی علاقوں میں در پیش چلینجوں کے لئے تیار کرنے پر مبارکباد پیش کی۔ ان کا کہنا تھا کہ ان ٹرینیز نے اس سنگ میل تک پہنچنے کے لئے غیر متزلزل عزم اور نظم و ضبط کا مظاہرہ کیا۔انہوں نے ریکروٹس کے روشن مستقبل اور کامیاب پیشہ ورانہ کیرئر کے لئے نیک خواہشات کا اظہار کیا۔موصوف مہمان خصوصی نے مختلف آؤٹ ڈور اور انڈور ٹریننگ سرگرمیوں میں نمایاں کاکردگی کا مظاہرہ کرنے والے ریکروٹس کو میڈلوں سے نوازا۔ٹرینیز میں سے پانچ کو مختلف سرگرمیوں میں شاندار کارکردگی کا مظاہرہ کرنے پر ٹرافیاں دی گئیں۔