کشمیر کے نابینا محمد شفیع کی مثالی زندگی

دنیا بھر کے ساتھ ساتھ کشمیر میں بھی جسمانی طور پر معذور افراد کو سماج میں ایک الگ نظر سے دیکھا جاتا ہے اور سماج ان کو ایک بوجھ تصور کرتا ہے لیکن بینائی سے محروم محمد شفیع لون اپنی محنت سے سماج کو خود جواب دے رہے ہیں۔

سرینگر کے مضافات کھنمو علاقے کے رہنے والے محمد شفیع لون برسوں سے چائے کی دکان چلا رہے ہیں اور اپنے بچوں اور اہلیہ کی کفالت کرتے ہیں۔

42 برس کے محمد شفیع لون کا کہنا ہے کہ 'وہ چوتھی جماعت میں زیر تعلم تھے جب وہ بینائی سے محروم ہوگئے۔ تاہم وہ قدرت کی اس آزمائش سے ہمت نہیں ہارے۔'

ان کا کہنا ہے کہ 'انہوں نے کھنمو کے بازار میں چائے کی ایک دکان کھولی اور اپنا روزگار خود کمانے لگے۔'

ابتداء میں ان کو بینائی نہ ہونے کی وجہ سے دکان چلانے میں کافی دشواریوں کا سامنا کرنا پڑا لیکن وہ کہتے ہیں کہ 'وقت گزرنے کے ساتھ ساتھ ان کو دکان چلانے میں مہارت حاصل ہوئی اور گزشتہ 20 برسوں سے وہ اس دکان کو کامیابی کے ساتھ چلا رہے ہیں اور دن بھر ان کی دکان پر خریداروں کی بھیڑ لگی رہتی ہے۔'

محمد شفیع لون کی محنت اور کوشش کو دیکھ کر ان کی شادی بھی ہوگئی اور وہ چار بچوں کے والد ہیں۔

ان کا کہنا ہے کہ 'چائے بیچ کر انہوں نے بچوں کو تعلیم سے آراستہ کروایا اور اپنا گھر بھی اچھی طرح چلا رہے ہیں۔'

محمد شفیع لون کا کہنا ہے کہ 'سرکار نے ان کی کبھی کسی قسم کی کوئی مدد نہیں کی۔'

ان کا کہنا ہے کہ 'کشمیر میں جو بھی معذور افراد ہیں۔ ان کو گھر بیٹھ کر سماج پر بوجھ نہیں بننا چاہئے بلکہ کوشش اور محنت سے اپنے پیروں پر کھڑا ہو کر اپنے لیے کمانا چاہئے۔'

محمد شفیع لون معذور افراد اور عام لوگوں کے لیے ایک مثال ہے۔