Mehbooba Mufti Slams BJP بی جے پی درگاہوں اور خانقاہوں کو اپنے کنڑول میں لینا چاہتی ہے، محبوبہ مفتی

محبوبہ مفتی نے ٹویٹ کرتے ہوئے کہا کہ بی جے پی اپنے فرقہ پرست ایجنڈے کو آگے بڑھانے کے لیے درگاہوں اور خانقاہوں کو اپنے کنڑول میں لینا چاہتی ہے۔

جموں و کشمیر کی سابق وزیراعلیٰ محبوبہ مفتی نے بھارتیہ جنتا پارٹی کو تنقید کا نشانہ بناتے ہوئے کہا کہ منافقت کی کوئی حد نہیں ہے۔ ایک جانب بی جے پی درگاہوں، آستانہ عالیہ اور خانقاہوں میں دستار بندی پر پابندی عائد کر رہی ہے تو وہیں دوسری طرف خود دستار بندی کرانے کا کوئی موقع نہیں چھوڑتی ہے۔

انہوں نے ٹویٹ کرتے ہوئے کہا کہ بی جی پی یہاں کے صوفی روایات کو ختم کر کے اپنے فرقہ پرست اور تفریق انگیز ایجنڈے کو عملی جامہ پہنانے کے لیے درگاہوں، زیارت گاہوں اور آستان عالیہ پر اپنا کنٹرول حاصل کرنا چاہتی ہے۔ محبوبہ مفتی نے اپنے ٹویٹ میں دستار بندی کرتے ہوئے وزیراعظم نریندر مودی اور جموں وکشمیر کے لیفٹیننٹ گورنر منوج سنہا کے فوٹوز بھی شیئر کیا ہے۔

اس سے قبل محبوبہ مفتی نے اسکولوں میں صبح کی پریئر پر بھجن گانے کے حکم نامے پر بھی بی جے پی کو آڑے ہاتھوں لیتے ہوئے کہا کہ بی جے پی کبھی مندر مسجد تو کبھی اسکولوں میں بھجن گانے کا حکم نامے جاری کر کے اصل مسائل سے لوگوں کی توجہ ہٹانے کی کوشش کررہی ہے۔

واضح رہے کہ جموں وکشمیر وقف بورڈ نے پیر کے روز ایک حکم نامہ جاری کرکے اپنے زیر نگرانی سبھی مذہبی مقامات پر لوگوں خاص کر سیاستدانوں کی دستار بندی پر مکمل پابندی عائد کر دی ہے۔