اتل ڈلو جموں کشمیر کے چیف سیکریٹری

جمعرات 30 نومبر کو نوکری سے سبکدوش ہو رہے چیف سیکریٹری ارون کمار مہتا کی جگہ مرکزی حکومت نے کشمیر سے تعلق رکھنے والے سینئر آئی اے ایس آفیسر اتل ڈلو کو چیف سیکریٹری کے عہدے پر فائز کیا ہے۔ Atal Duloo IAS Chief Secretary of Jammu and Kashmir

سرینگر:مرکزی سرکار نے اگمٹ کیڈر کے سینئر انڈین ایڈمنسٹریٹو سروس (آئی اے ایس) افسر اتل ڈلو کو جموں کشمیر کا نیا چیف سیکریٹری تعینات کیا ہے۔ اتل ڈلو موجودہ چیف سیکریٹری ارون کمار مہتا کی جگہ اس عہدے پر فائز ہوں گے۔ ارون کمار مہتا 30 نومبر یعنی جمعرات کو نوکری سے سبکدوش ہو رہے ہیں۔ اتل ڈلو سنہ 1966 میں جنوبی کشمیر کے کولگام ضلع میں پیدا ہوئے ہیں لیکن انکے والد نوکری کے سلسلے میں سرینگر منتقل ہوئے اور بعد میں دہلی میں رہائش اختیار کی۔ اتل ڈلو سنہ 1988 بیچ کے آئی اے ایس افسر ہیں اور انہوں نے انجینئرنگ کرنے کے بعد آئی اے ایس کو ترجیح دی۔

اتل ڈلو گزشتہ برس مرکزی سرکار میں ڈیپوٹیشن پر گئے تھے جہاں وہ محکمہ داخلہ میں جوائنٹ سیکرٹری کے عہدے پر کام کررہے ہیں۔ تاہم گزشتہ ہفتے محکمہ داخلہ نے ایک حکمنامے کے ذریعے انکو مرکزی سرکار سے یونین ٹریٹری میں واپس تعینات کیا اور آج چیف سیکریٹری کے عہدے پر فائز کیا۔ اتل ڈلو کو سنہ 2013 میں یوم جمہوریہ کے موقع پر ’’قابل ستائش کام‘‘ انجام دینے پر سٹیٹ ایوارڈ سے بھی نوازا گیا ہے۔ سنہ 1996 میں اسمبلی انتخابات کو کامیابی سے منعقد کرنے کے لئے سلور ایواڈ سے بھی انہیں نوازا گیا ہے۔

جموں کشمیر میں اتل ڈلو نے قریبا 24 محکموں میں کام کیا ہے، جن میں صحت و میڈیکل ایجوکیشن کے فائنانشل کمشنر کے طور پر بھی انہوں نے خدمات انجام دی ہیں، اور دہلی ٹرانسفر سے قبل وہ محکمہ زراعت کے ایڈیشنل چیف سیکریٹری رہے۔ یاد رہے کہ ارون کمار مہتا 31 مئی سنہ 2021 کو جموں کشمیر کے چیف سیکریٹری تعینات کئے گئے تھے۔ انہوں نے سابق بیروکریٹ بی وی آر سبھرانیم کی جگہ لی تھی جن کو یہاں دفعہ 370 کی منسوخی کے بعد تعینات کیا گیا تھا۔ سبھرانیم کی قیادت میں ہی جموں و کشمیر کے خصوصی آئینی حیثیت کو ختم کیا گیا اور سابق ریاست کو دو مرکزی زیر انتطام علاقوں میں تقسیم کیا گیا۔ مانا جاتا ہے کہ ریاست کی تنزلی کے اس آپریشن میں سبھرامنیم کا مرکزی کردار تھا جنہیں مرکز نے محبوبہ مفتی کی قیادت والی مخلوط حکومت کے دوران ہی جموں و کشمیر میں تعینات کیا گیا تھا۔ سبھرامنیم نے اپنے تقرر کے دوران کئی ایسے بیانات دئے جن کو یہاں متنازعہ قرار دیا گیا تھا۔